Gimanduan ni Presidente Rodrigo Duterte ang tanang mga buhatan sa gobiyerno sa pagsagop sa digital payments alang sa ilang tagsa-tagsa ka disbursements ug collections.
Si Duterte, sa executive order nga gipirmahan ni Secretary Salvador Medialdea niadtong Mayo 12, 2022, nihimo sa kamanduan aron mapadali ang pag-apod-apod sa pinansiyal nga tabang ngadto sa mga benepisyaryo.
Ubos sa Executive Order (EO) 170, ang tanang mga departamento, ahensiya, ug instrumentalidad sa gobyerno, apil na ang state universities and colleges ug state-owned o controlled corporations, gimandoan sa pagtugot sa digital payments para sa ilang tagsa-tagsa ka disbursement ug collections.
Naglakip kini sa pagbayad sa mga butang, serbisiyo ug uban pang mga paggasto, sama sa pag-apod-apod sa tabang pinansiyal, ingon man ang pagbayad sa suweldo, allowance ug uban pang bayad sa mga empleyado niini.
Si Duterte niingon nga kini magpasiugda sa mas hapsay nga paghatod sa mga serbisiyo sa gobyerno, pagpadali sa mga transaksiyon, pagpausbaw sa kita ug pagpakunhod sa risgo sa graft and corruption.
Ang mga ahensiya nga nasakop sa mando wala na kinahanglana nga adunay espesiyal nga arrangement sa mga institusiyong pinansiyal aron ma-disburse ang mga pundo direkta sa mga account sa transaksiyon sa mga nakadawat o benepisyaryo, gihuptan man sa gobyerno o pribado nga mga institusiyong pinansiyal.
Kinahanglang mosagop usab sila og business continuity plan aron makapangandam sa mga kalamidad ug uban pang emerhensiya diin ang pagbayad pinaagi sa digital nga paagi mahimong dili maapektuhan.
“For this purpose, covered agencies may use facilities of government servicing banks such as Advice to Debit Account or interoperable Electronic Fund Transfers,” mabasa sa EO.
“Further, covered agencies shall be responsible for preparing payment instructions with all necessary details, including the name of the beneficiary, details of the transaction account, and amount involved,” kini nidugang.
Samtang mahitabo ang transisyon, ang mga sakop nga ahensiya kinahanglang magsiguro sa padayon nga paghatod sa mga serbisiyo publiko, ilabina ang pagdawat sa dili digital nga paagi sa pagbayad.
Ang technical working group, nga naglakip sa Departments of Finance ug Budget and Management (DBM), Bureaus of Treasury (BTr) ug Internal Revenue (BIR) ug ang Government Procurement Policy Board Technical Support Office, pagahimuon aron sa paghatag og giya ug pagpasiugda sa maayong paggasto ug transparency sa pagpalit sa mga solusyon sa digital nga pagbayad sa mga sakop nga ahensiya.
Ang Dept. of Finance uban sa koordinasiyon sa Bangko Sentral ng Pilipinas, Commission on Audit, DBM, BTr, BIR ug uban pang mga hingtungdan nga ahensiya sa gobyerno, maghimo sa mga lagda ug regulasiyon sa pagpatuman sa EO. (TPM sa SunStar Philippines)