HINAY-HINAY nang nilugdang ang kainit sa nilabay'ng bugnong lugaynon. Sama sa mga nangaging piniliay, naay nagmaya, naay naglagot. Naay daug, naay naparot.
Mao gyud kini ang politika kay sa pangalan pa lang "pulihan-tika" nay mga tawo nga gusto og posisyon sa gobyerno sa iyang kaugalingong katuyoan.
Di nato mapugngan ang tawo nga gustong moserbisyo kay mao daw kini ang ilang panawagan og tadhana o "destiny" sa kinabuhi.
Di pud nato mapugngan ang kagustohan sa uban nga maadunahan tungod sa politika, o kaha mosikat ug mabutang sa kasaysayan sa nasud ang ilang bansagon.
Di pud nato mapugngan ang mga kandidato nga di makadawat sa ilang kapildihan bisan kung klaro na ang resulta sa balota. Nidaug na ang Bongbong Marcos (BBM)-Sara tandem nga hastang taasa sa ihap sa boto. Ang tagsa-tagsa kanila nakakuha'g sobra 30-milyon ka boto nga karon ra nahitabo sa kasaysayan.
Dunay pagtuon nga nagkanayon nga mas daghan daw ang nisalmot o niboto karon kung ikumpara sa niaging presidential election sa 2016 diin nakakuha si Presidente Rody Duterte og sobra 16-milyon lang ka boto.
Ingon pud sa pagtuon nga mas daghan karong mga batan-on nga nisalmot nga nadani sa alindog ni Mayor Sara ug sa misteryo nga naglimin sa pagkatawo ni BBM. Kadaghanan kanila wa masayod sa kasaysayan sa Martial Law ubos sa amahang Marcos Sr. busa imbis nga masuko, ila hinuong gisuportahan ang anak aron masayran kung nganong daghan ang napungot sa ilang pamilya.
Sa ilang tan-aw, mas tinuod nga lider si BBM bisan kung daghan kining apan kung ikumpara sa mga kontra nga may hataas nga kinaadman kay buot niyang magkahiusa ang katawhan sa pag-atubang sa problemang gihambin sa Pilipinas.
Nag-una nga atubangon sa bag-ong administrasyon ni BBM-Sara mao ang gibalitang P12.3 trilyon nga utang sa Pilipinas sa langyaw'ng tigpahulam o "foreign debts" sa Enero 2022. Sa tinamban nga pagsumada, mogawas nga adunay utang nga P111.81 ang matag usa sa 110-milyon ka Pinoy, apil na niini ang bag-o pang natawo nga bata. Gihimo kining isyu karon sa mga anti-BBM-Sara kay dili sila makatugot nga mobalik pag-usab ang nagpasiugda sa Proclamation Order 1081 o ang pagdeklara sa Martial Law sa Pilipinas niadtong Septyembre 21, 1972.
Dili malilong nga daghang napriso, nawala ug nangamatay nga aktibista ug yanong lungsuranon sa armadong puwersa nga dili hupot ni Apo Marcos ug gisulsulan sa komunista ug kapitalistang panghunahuna nga nagtigi sa pag-ilog sa paghupot sa gahum sa nasud.
Subo nga sa Pilipinas gihimo ang eksperimento niining dagkong panghunahuna o "proxy war" tali sa United States of America nga nagduso sa panghunahuna ug sistemang kapitalista batok sa komunistang Russia nga kanhing Union of Socialist States of Russia (Ussr) ug gitawag nato nga "cold war."
Karon nga nigawas na ang resulta sa eleksiyon, gibuhi na usab sa US ang away nila sa komunistang Russia ug China. Dili nila manok si BBM-Sara tandem kay kahibalo sila nga mas mokiling kini sa malinawong pakig-istorya sa China sa hisgutanang West Philippine Sea. Unta magmata ug magtuon kita sa kamatuoran.