NAGPABILIN gihapon nga anaa sa Alert Level 1 ang dakbayan sa Davao sugod Mayo 16, 2022 hangtud Mayo 31, 2022.
Subay sa gipagula nga pahibalo sa Facebook page sa City Government of Davao gipakita nga ang Davao City pabiling anaa sa Alert Level 1 sa classifications sa coronavirus disease (Covid-19).
Apan ang Davao de Oro, Davao del Norte, Davao del Sur, Davao Oriental ug ang Davao Occidental anaa sa Alert Level 2.
Tungod niini, padayong nagpahimangno ang lokal nga panggamhanan sa Davao sa mga Dabawenyos sa pagtuman sa mga minimum public health standards batok Covid-19 kung diin kinahanglan nga makanunayon ang paghugas og kamot, pagsul-ob sa face mask, ug pagpabakuna batok sa Covd-19 ug sa booster shots niini alang sa dugang proteksiyon.
Gipahibalo sab nga mga wala pa nakapabakuna nga naay mga operational vaccination sites alang sa Mayo 16, 2022 hangtud Mayo 21, 2022 sa Abreeza Mall, NCCC Mall Buhangin, Gaisano Grand Toril, Malabog, Calinan Central Elementary School, People’s Park, Crocodile Park, SM Ecoland, SM Lanang, GMall Bajada, GMall Toril, ug Gaisano Grand CityGate.
Dugang pahibalo alang sa mga buot magpabakuna og 1st dose, dalhon lamang ang DQR, magdala sab og valid ID ug ballpen.
Sa mga magpa-second dose ug kadtong magpa-booster shots, vaccination card na lang ang dal-on. (Jeepy Compio/Nicka Ella Flores, Davao del Norte State College, Intern)