TACURONG CITY -- Naa na sa maayong kahimtang ang inahan nga nanganak sa gisakyan nga traysikel nga wala na makaabot sa ospital samtang himsog nga masuso ang iyang anak.
Gitabang sa mga pulis ang mabdos nga inahan alas 2:45 sa hapon niadtong Dominggo sa President Quirino, Sultan Kudarat Province.
Gibutyag ni Sultan Kudarat Provincial Police Office Director Colonel Tom Tuzon nga nanghinlo daplin sa kalsada sa Barangay Pedtubo sa nahisgutang lungsod ang mga sakop sa 3rd Maneuver Platoon sa 1st Sultan Kudarat Provincial Mobile Force Company (SKPMFC) ug nakadungog og singgit sa babaye nga nagpatabang.
Abtik nga nagresponde ang mga pulis nga gipangunahan ni Patrolman Angelo Padilla ug ilang gitabangan si Saima Mua nga sakay sa traysikel nga nanganak na.
Mismo si Padilla ang nahimong mananabang, lakip na ang iyang mga kauban ug luwas nga nanganak si Mua.
Naatlan sab nga dunay miagi nga ambulansiya sa Buluan District Hospital hinungdan nga gikarga ang mag-inahan aron maseguro ug masusi ang ilang panglawas sa doktor.
Nasayran nga gikan si Mua sa ilang balay sakay sa traysikel paingon sa Buluan District Hospital apan wala na kini kapugong ug didto na nanganak sa iyang gisakyan.
Gidayeg si Padilla ug iyang mga kaubanan sa mga nitizen sa ilang pagtabang sa nanganak nga si Mua.