TACURONG CITY -- Luwas na sa makuyaw nga kahimtang ang 11-anyos nga lalaki human maipit sa natumba nga punoan sa lubi alas 4 sa hapon niadtong Dominggo, Mayo 15, sa Kalamansig, Sultan Kudarat.
Base sa taho gikan sa Kalamansig Municipal Police Station, nasayran nga naglingkod lang sa nakaparada nga motor traysikad duol sa ilang balay ang biktima nga si alyas Emman, molupyo sa Purok Mangga, Barangay Nalilidan sa nahisgutang lungsod.
Apan kalit lang mihaguros ang makusog nga hangin ug wa damhang natumba ang usa ka punoan sa lubi padulong sa gihimutangan sa biktima hinungdan nga naipit ang iyang paa.
Daling gisapupo ang batan-on sa iyang pamilya ug gihatud ngadto sa Lebak Doctors Hospital ug nagpaalim na karon sa iyang nahiagoman nga angol.
Nasayran nga ang probinsiya sa Sultan Kudarat nakasinati og kusog nga ulan, inubanan sa kusog nga hangin gumikan sa nagkulismaot nga lakat sa panahon sa maong adlaw.
Mihatag na og tabang ang lokal nga panggamhanan sa Kalamansig sa pamilya sa biktima sa galastuhan sa ospital samtang nanawagan sa publiko nga magbinantayon kanunay, ilabi na panahon sa kusog nga ulan ug hangin.