GIBUTYAG ni Davao City Mayor ug presumptive vice president Sara Duterte-Carpio niadtong Lunes, Mayo 16, nga wala pa sila mag-istorya sa iyang amahan, Presidente Rodrigo Duterte, sukad pa Agosto sa miaging tuig.
Kini ang gibutyag ni Duterte-Carpio sa paghinabi kaniya kon diin gipangutana siya kon naistorya na ba niini ang iyang amahan human siya nanguna sa tigi sa pagka-bise presidente sa 2022 nga eleksiyon.
"Wala pa po mi nagka-istorya ni President Duterte since August of last year," tug-an sa mayor sa paghinabi kaniya sa 87.5 FM Davao City Disaster Radio.
Kini bisan pa kon ang Presidente ug ang iyang anak pulos mitambong sa miting de avance sa Hugpong sa Tawong Lungsod-Hugpong ng Pagbabago (HNP) pangulohan karon ni mayor-elect Sebastian Duterte niadtong Mayo 6, pipila ka adlaw una ang Mayo 9 nga eleksiyon sa dalang San Pedro ning siyudad.
Matud niya nga siya ug ang iyang amahan wala gyud personal nga nagkita atol sa kalihukan. Ang mayor nakahimo lang og sandurot uban sa dugay nang pangabaga sa iyang amahan nga si Senador Christopher "Bong" Go.
Apan naglaum siya nga maghiusa na sila sa iyang amahan kay pipila na lang ka adlaw moretiro na kini sa iyang pagka-presidente ug sa politika.
"I'm sure, very, very soon, magkita gihapon mi ni Pangulong Duterte," pasalig sa presidential daughter.
Atol sa miting de avance, nagpasiaw si Duterte-Carpio nga magdali siya og human sa iyang pagpamulong aron nga makabiya dayon sa kalihukan una pa man moabot ang iyang amahan.
"Pero mosibat ko bago siya [Presidente] moabot kay basi kasab-an ko. ‘Inday Sara unsa na pud gibuhat nimo?’," pasiaw ni Duterte-Carpio.
Kahinumdoman nga ang mayor nagsulti nga wala siya maghisgut og mga butang nga dunay kalambigitan sa politika ngadto sa iyang amahan.
Kahinumdoman usab nga nagpadayag og pagka-diskontento si Duterte ngadto sa kapares sa mayor, kanhi senador Senador, karon presumptive President Ferdinand "Bongbong" Marcos, Jr.
Ang Presidente, sa iyang daghang mga pagpamulong sa publiko, subling nagsulti nga wa siyay gi-endosar nga pagka-presidene sa eleksiyon, ug moboto lang siya sa iyang anak.
Samtang gitakda nga himuon ni Duterte-Carpio ang iyang inagurasyon isip bise presidente sa Davao City sa Hunyo 19, una pa man ang pagpanumpa ni Marcos.
Wala hinuon maklaro kon ang incumbent president personal nga mosaksi sa maong kalihukan. (RGL)