MAS gikabalak-an karon sa katawhan ang giingong local transmission sa Covid-19 Omicron BA.2.12.1 subvariant sa nasud, kini subay sa taho gikan sa Department of Health (DOH) niadtong Sabado, Mayo 14.
"Kailangan po natin ng enough evidence para po maipakita natin at ma-analyze natin kung talagang meron na tayong local transmission," sulti ni DOH spokesperson Maria Rosario Vergeire sa public briefing.
Niadtong Biyernes, giingong katorse (14) ka mga kaso sa Omicron BA.2.12.1, nga dunay duha sa Metro Manila ug giingong dose (12) sa Puerto Princesa, Palawan.
Alang sa usa ka Dabawenyo nga luyo sa impormasyon nga mas makatakod kini, kinahanglan kuno nga nakat-on na ang tanan paunsa kini malikayan.
"Magduha na ta katuig aning hitaboa, unta nakat-on na ta paunsa ta makalikay niini," ingon ni Geraldine Gegori, 45-anyos, taga Barangay 23-C, Isla Verde, Boulevard, Davao City.
Nasagmuyo sab ang usa ka traysikel drayber diin suma niya basin mao na sab kini ang mamahimong hinungdan nga matigayon na sab ang hugot nga quarantine.
"Sobra na kung mahitabo na sab ang lockdown sa pipila ka dapit, sa panahon bitaw sa eleksyon perte mang mingawa nila aning Covid, karon nga nahuman na ang eleksyon kini na pud ilang tutokan? Naunsa na man intawon ning mga ahensya sa gobyerno?" ingon ni Edgar (nagpatago sa bansagon), taga Barangay 33-D, ning siyudad.
Ning kasamtangan, ang Davao City nagpabiling anaa sa Alert Level 1 sugod Mayo 16, 2022 hangtud Mayo 31, 2022, diin ang Davao de Oro, Davao del Norte, Davao del Sur, Davao Oriental ug ang Davao Occidental, anaa sa Alert Level 2.
Tungod niini, padayong nagpahimangno ang City Government of Davao sa mga Dabawenyos sa pagtuman sa mga minimum public health standards batok Covid-19 kung diin kinahanglan nga makanunayon ang paghugas og kamot, pagsul-ob sa face mask, ug pagpabakuna batok sa Covid-19 ug sa booster shots niini alang sa dugang proteksiyon.