STA. MARIA, Davao Occidental -- Hugot nga gilimod sa kapulisan sa lungsod sa Sta. Maria ning probinsiya ang report nga dunay usa ka lantsa didto sa Barangay San Agustin ang girapido og mga bala sa armas.
Subay sa Facebook post sa Sta. Maria Municipal Police Station (MPS), nasayran nga mga alas 7:30 sa gabii, Mayo 16, 2022, nakadawat og tawag ang hepe labot usa ka lantsa nga giingong nasunog nga gipanag-iyahan sa usa ka Kapitan Wantoy Morales.
Giingon nga daling miresponde sa alarma ang kapulisan sa dapit sa pagpanguna ni Police Major Kirby Badilles, ang hepe sa Sta. Maria MPS.
"Subay sa nakalap nga impormasyon, dili tinuod nga gisunog o ‘GIRATRATAN’ ang maong lantsa taliwala sa mga balita nga mikalat sa social media. Wala nasunog ug walay damage ang maong lantsa," sa Faceboook post sa Sta. Maria MPS.
Kagahapon sa buntag, gipahibalo sab sa Police Regional Office (PRO) Davao Region ngadto sa mga tigbalita nga di tinuod ang maong taho.
Narekober sa kapulisan ang usa ka mineral water bottle nga dunay gasolina sa sulod ug duha ka gatorade bottles nga duna sa'y gasolina ug usa ka galon nga coolant nga dunay sunog sa ilawom niini, apan wa kini nagpasabot nga girapido ang maong lantsa.
Ang kapulisan sa Sta. Maria padayong misubay sa maong impormasyon aron masuta kung hulga lang ba kini ug duna ba kaha'y nagpalibot nga istorya sa giingong maong sayop nga impormasyon.