SAMAL ISLAND -- Daghan karon ang mikunot ang kilay sa perte kataas nga plitihan sa Island Garden City of Samal (Igacos), probinsiya sa Davao del Norte.
Hilabihan ang kakurat sa pipila ka mga pasahero sa mga bao-bao, pedicab ug tricycle sa Igacos human nga gipatuman ang bag-ong taripa sa plitihan sa kasamtangang presyo sa gasolina sa Samal Island.
Sa eksklusibong report sa dxGM Super Radyo Davao, anaa na sa minimum nga plitihan, gikan sa P8, nahimo na kining tag P17 nga hilabihang taas sa nahisgutang minimum fare.
Una niini, gitaho pinaagi sa Super Radyo nga nagpagula ang lokal nga panggamhanan sa Samal Island og bag-ong Taripa o Fare Matrix, depende sa presyo sa gasolina.
Nasayran nga kung ang matag litro sa gasolina, anaa sa P25-30, anaa sa P8 ang plitihan samtang, sa matag P5 nga pagsaka sa presyo sa gasolina, P1 sab ang isaka sa pliti.
Kung ang presyo sa gasolina anaa sa P71 hangtud P75 matag litro, ang minimum fare anaa sa P17. Ilawom sa City Ordinance 182, series of 2011, P1 usab ang pagsaka sa matag mo-sobra nga kilometro.
Nasayran sab nga ang mga operator nga dili mosunod sa bag-ong Fare Matrix, makamulta og P1,000 hangtud P3,000 ug kanselasyon sa ilang Permit to Operate.
"Perte na bang mahala oy, magbaktas na lang me padung sa beach nga ligoan, enjoy pa uban sa mga barkada," ingon ni Nhul Jalali, taga Barangay Lapulapu, Agdao District, Davao City, kinsa ang barkada hilig manabok padung sa Samal Island.
Ang mga drayber sa Samal Island nalipay sa maong hitabo, apan nasubo sab sila kay perte na kamahal sa presyo sa mga nag-unang petroleum products. (Uban sa taho sa Super Radyo Davao)