Nadepensaan sa Cebuana nga si Rubilen Amit ang iyang women’s 9-ball singles title pinaagi sa pagmakmak ni Jessica Tan sa Singapore, 7-2, sa finals kagahapon, Mayo 17, 2022 sa 31st SEA Games sa Hanoi, Vietnam.
Nidaog si Amit sa nag-unang tulo ka racks apan nakasikit dayon pagbalik si Tan, 3-2.
Human niini, miratsada na si Amit diretso sa kadaugan.
Sa laing bahin, gipangdispatsar nila ni Carlo Biado ug Johann Chua ang ilang tagsa-tagsa ka kontra sa semifinals aron paghan-ay og All-Filipino finals sa men’s 9-ball pool event.
Tungod niini, ang Pilipinas nakaseguro nang daan og dugang gold ug silver medals.
Nakaabante si Biado pinaagi sa pagpukan ni Aloysius Yapp sa Singapore, 9-7, samtang si Chua nibuntog sa laing bilyarista sa Singapore nga si Lian Han Toh, 9-3.
Sa sayo pa, ang beteranong si Efren “Bata” Reyes nakaseguro na sab og bronze medal alang sa Pilipinas human sa iyang kadaugan batok kang Suriya Suanasing sa Thailand, 65-58, sa quarterfinals sa carom event.
Ning sangkaa, ang gitawag og The Magician nalubong sa sayong bahin, 24-39, apan hinayhinay kining nigukod paingon sa kadaugan.
Ipadayon ni Reyes karong adlawa ang iyang kampanya diin aduna siya’y kahigayunan nga isaka sa silver o gold ang iyang medalya.