Padayon ta sa atong istorya bahin sa bag-o pa lang nahuman nga piniliay.
Dako og pagmahay si Vice Governor.
Napildi man god si Vice Governor. Unya dili kay pildi lang, gilubong pa gyod siya sa kapildihan kay layo ra kaayo ang iyang nakuha nga boto ikomparar sa iyang ka-kontra.
Ang nakaparat ra ba kay napildi siya sa usa ka batan-on ug dili beterano sa politika.
* * *
Hilabihan niyang bagutbot, oi.
Nagtuo siya nga modaog siya kay lapad na kaayo ang iyang kasinatian sa pamolitika, lig-on ang iyang mekanismo sa tanang barangay sa probinsiya ug mihatag pod siya og inangayan nga tag---. Plus, nakakuyog pod siya og gobernador nga kwartahan sab.
Pero ang resulta, gilubong man siya.
* * *
Sa dihang gi-interview siya sa media, nakalugar si Vice Governor og pahungaw sa iyang gibati.
Timing pod nga nakalugar na siya og analyze og dis-a gyod siya misipyat.
Sa dihang gipangutana siya sa iyang opinyon kon nganong napildi siya, way lipudlipod nga nisulti nga napildi siya tungod ni Governor.
Siyempre, natulala ang nag-interview kay wa mag-expect sa iyang tubag.
Pero, diretso nga misulti si Vice Governor nga napildi siya tungod kay pirmi na lang siya sa panagang sa mga batikos batok sa gobernador.
Imbes mopadayag unta siya sa iyang mga programa aron mapili og usab, nagamit ang tanan niyang panahon sa pag-depensa sa gobernador.
Nadamay na hinuon siya sa problema nga kon hunahunaon, wa may labot sa problema sa gobernador.
Pananglit, kanang batikos sa pangurakot, kanang batikos sa ka-istrikto sa Covid protocol, ang EOs (executive orders). Kanang kwestiyonable kaayo nga procurements, sumala sa bise gobernador, iya ra man pod na isip siya ang Head of Procuring Entity (HOPE).
Pero kay kauban sila ug niapil siya sa pagdepensa. Mao nay nakita sa bise gobernadot nga hinungdan nganong napildi ko.
* * *
Wa pa nato mahibaw-i kon nakadungog na ba ang Gobernador sa gipanulti sa iyang Bise Gobernador kay kon nakadungog na, segurado gyod nga moulbo ang kaspa sa Gobernador.
Tiaw bay ang Gobernador maoy pasanginlan nga maoy nakapildi kaniya.
Kon huna-hunaon ra ba, ang Gobernador maoy naggasto sa tanan kay mao man ang ilang sabot.
Di na unta mosugot ang asawa sa Bise Gobernador nga molansad pa ang iyang bana kay masakiton kini apan nagpasalig man ang Gobernador nga maoy moabaga sa gasto, misugot na lang kini.
Unya, bisan gisagobang na niya ang galastuhan sa kampanya, siya lang gihapon ang pasanginlan sa kapildihan, pagka-demalasa pod.
Buyno, nisulti na ang Gobernador nga moundang na siya sa pamolitika human siya ilubong sa balota, mao pod tingali ni ang rason nga medyo isog na nga nipadayag ang Bise Gobernador.
Mao tingali ni ang giingon nga sa politika walay permanente nga amigo, ang permanente lang ang personal interest.