Ang oposisiyon, sagad minoriya sa konseho sa local government units (LGUs), giila nga nagdala sa papel sa check and balance sa pagtuki sa mga isyu ug ang pagpalabang og mga balaudnon o ordinansa aron molutaw ang mas labing maayo sa kaayohan sa tanan.
Kon kontrolado ang konseho, hanoy unya o dali ang paglabang og balaudnon bisan wala kini matuki pag-ayo tungod sa mayoriya sa miyembro o dili ba kaha nangharos sa pagdaug gikan sa usa ka partido, segurado na nga modaug sa botasiyon. Makapaspas kini sa proseso apan, dili sa tanang panahon paborable sa katawhan.
Kini ang sitwasyon sa tri-cities sa Sugbo, Mandaue ug Lapu-Lapu. Nangharos ang administrasiyon gikan sa mayor, bise mayor ngadto sa mga sakop sa konseho, gawas sa dakbayan sa Sugbo nga dunay pipila ka oposisyon ang nakadaug sa eleksiyon naidtong Mayo 9, 2022.
Maapiki kaha ang prinsipyo nga check and balance? Posible kon magyangoyango lang ang tanan. Way mobabag tungod sa pagka kauban sa partido o kaalyado. Pait nga talan-awon. Apan nisalig kita sa indibiduwal nga nagpapili aron pagserbisyo sa publiko, dili ang interes sa partido.
Dakong hagit sa matag usa nga sakop sa konseho, lakip sa bise mayor, nga kanunay mosagop sa kritikal nga baroganan ug pro-active sa pagpanalipod sa katawhan ug ang pagpatuman sa mga lakang sa pagpalambo sa sosiyodad ug mga proyekto alang sa ekonomikanhong kalamboan.
Sayo pa, ang paghukom sa lihok sa bag-ong mga napili ug nasubli sa posisyon. Sa Hulyo 1, 2022 pa ang opisyal nga pagsugod sa ilang bag-ong termino. Kadtong nadeklarar na sa Commission on Elections (Comelec) nga mananaug, naghinayhinay na karon sa transition period.
Paghinumdom, ang prinsipyo sa check and balance dili bugtong papel sa oposisyon. Responsibilidad kini sa tanan.