Masaligon si Cordova Mayor-elect Cesar “Didoy” Suan nga mopatigbabaw ang “rule of law” ug iyang gidayeg ang integridad sa Commission on Elections (Comelec) taliwa sa pasangil sa iyang kaatbang nga adunay mga iregularidad atol sa piniliay.
Si Suan nagkanayon nga nisalig siya sa katakos sa Comelec. Gibutyag na ni acting Provincial Election Supervisor Jerome Brillantes nga walay lig-on nga basehan sa pagpahigayon og special elections sa Cordova.
Ang bag-ong napili nga mayor sa Cordova nanghinaot nga madawat ni outgoing Mayor Mary Therese Sitoy-Cho ang resulta sa piniliay ug iyang hangpon ang bag-o niyang kinabuhi gawas sa munisipyo sa ilang lungsod.
“May she find a space in her heart to embrace the election results and be at peace with her new life outside the corridors of the municipal hall,” padayag ni Suan sa iyang Facebook page.
Ang incoming mayor nagkanayon nga mopatawag siya og press conference sa Biyernes aron pagtubag sa tanang mga pangutana labot sa iyang pagkapili, alegasiyon sa iyang kaatbang ug iyang mga programa ug proyekto sa iyang lungsod.
Si Suan kinsa incumbent municipal councilor sa Cordova nipilde kang Cho og 4,170 votes human siya nakakuha og 21,222 botos samtang ang outgoing mayor aduna lay 17,052 botos.
Nipasangil si Cho nga dunay mga iregularidad nga nabantayan busa nagtinguha siyang dunay special elections.
Si Suan nga negusyante ug nahimong pulitiko maoy naglumpag sa dul-an 50 ka tuig na nga pangatungdanan sa mga Sitoy sa Cordova.
WAY RASON
Way nakitang rason ang Comelec sa probinsya sa Sugbo nga mopahigayon og special election sa lungsod sa Cordova bisan pa sa mga pasangil kalabot sa giingong lapad nga pinalitay sa botos ug uban pang mga iregularidad atol sa piniliay sa Mayo 9, 2022.
Matod ni Brillantes nga luwas ug hapsay ang piniliay sa lungsod atol sa eleksiyon.
“So far, we have not received any complaints of election-related violence from Cordova... The elections there were peaceful and orderly,” matod ni Brillantes sa Mayo 16, 2022.
Giangkon hinuon ni Brillantes nga nasinati ang pagpalyar sa mga vote counting machines (VCM) apan dali rang nailisdan ang mga naguba.
“True, there were VCMs (vote-counting machines) that malfunctioned but these were immediately addressed, and did not stop voters from casting their ballots.”
Ang panahom kabahin sa giluwatang pamahayag ni Cho atol sa flag raising ceremony sa lungsod sa Lunes, Mayo 16.
Diin iyang gipasidan-an si Suan kalabot sa pagpamalit og botos.
Subay niini, gianunsiyo usab ni Cho ang paghimo niya og legal nga lakang batok ni Suan lakip na ang electoral protest.
Sa samang higayon iya usab gihangyo ang Comelec kon mahimong mopahigayon og special elections.
“One of the grounds for holding special elections in an area is when the actual elections were halted due to force majeure,” pasabot ni Brillantes.
Wala pa hinuoy nadawat nga kopya sa electoral protest ang Comelec.
Tambag ni Brillantes nga mosumiter sa ilang election protest sa Regional Trial Court.