Gilauman nga mahimo nang P5,000 ang honorarium sa mga barangay health workers (BHW), daycare workers, barangay animal health aide BAHA ug barangay nutrition scholars (BNS) sa ikalimang termino ni Cebu Governor Gwendolyn Garcia isip pagtuman sa iyang saad.
Kini maoy gipahibawo ni Garcia sa mga tigbalita sa usa ka press conference sa Mayo 16, 2022.
Niadtong Marso 25, atol sa unang adlaw sa kampanya, gisaad ni Garcia sa mga barangay workers ang paghatag og dugang incentives kanila kon hatagan og kahigayonan nga mapili pag-usab isip gobernador.
Sa kasamtangan, anaa sa P4,250 ang madawat sa mga barangay worker. Aron mahimo kining P5,000, kinahanglan umentuhan kini og P480.
“Nakasaad nako adto kinahanglan nato nakong tumanon hangyo sila ang mga BHW P4,200 man tingali to. Karon tag P5,000 na sila. I promised nga for my 5th term P5,000 na ilang madawat sa BHW, BNS, daycare ang tanod a little lower pero mosaka sad na,”matod ni Garcia.
Ang mga barangay tanod kasamtangan usab nga nagdawat og tag P3,250 nga honorarium. Moabot usab sa P1,000 alang sa GAD (Gender and Development) focal lakip usab sa lupon.
Wala pa hinuoy gipadayag si Garcia kon pila ang increase alang sa mga barangay tanod, GAD focal ug Lupon apan gilaraw niini ang pagpausbaw sa ilang mga honorarium.
Sa 2019 una nang nipresentar ang Government Service Insurance System (GSIS) sa Probinsya nga mahimong ipaubos sa group personal accident insurance program ang mga barangay worker ilabi na ning panahon sa pandemya.
Sa maong insurance program mahimong madawat niini ang total insurance coverage nga P65,000. Sa maong pundo, P50,000 gigahin alang sa principal sum, P5,000 alang sa medical reimbursement ug P10,000 alang sa burial assistance.
Sa kasamtangan, wa pay petsa kon kanus-a kini ipatuman sa probinsya.