Number 4 most wanted person sa Central Visayas nga adunay kasong pagpamaligya sa illegal nga drugas nadakpan sa Criminal Investigation and Detection Group (CIDG 7) Regional Field Unit.
Ang nadakpan giila nga si Clarissa Ricablanca, taga Barangay Lahug, siyudad sa Sugbo, human nalutsan og warrant of arrest niadto pang 2016 nga giluwatan ni Judge Soliver Peras, acting presiding judge sa Regional Trial Court (RTC) Branch 21 sa dakbayan sa Sugbo nga way piyansa nga gitugot ang korte.
Matod ni Police Colonel Ireneo Dalogdog, regional chief sa CIDG 7, nga ang iyang mga personnel nakadawat og impormasiyon gikan sa kasaligang tinubdan nga nasigpatan si Ricablanca sa maong lugar.
Tungod niini, dali nga girumbo sa mga operatiba sa CIDG 7 ang dapit ug gi serve dayon ang warrant of arrest. Giingong dugay nadakpan ang akusado tungod kay magbalhinbalhin og pinuy-anan ug karong tuiga lang nibalik sa Barangay Lahug.
Ang pagkadakop kang Ricablanca kabahin kini sa kampanya nga gimando nga ipatuman sa ilang director nga si Police Major General Eliseo DC Cruz, diin ilang gipalambo ang pagpangita sa mga most wanted person nga nabutang na sa cold cases.