Sa ikalimang termino isip gobernador sa lalawigan sa Sugbo, gipahibawo ni Gobernador Gwendolyn Garcia ang pipila sa iyang mga programa alang sa probinsya.
Unang gihisgutan mao ang road concreting projects sa probinsiya, pagpalambo sa health services ug pagpadayon sa sustainable programs nga nahimo ubos sa padayong pandemya.
Sumala pa sa gobernador nga duna pay padayunon sa pagpasemento nga mga dalan sa lalawigan nga wala matiwas sukad sa pagsugod sa campaign period.
“Padayon gihapon atong road concreting projects with less than 100 kilometers for our provincial roads and barangay roads,” matod ni Garcia.
Ang maong mga dalan pamutangan sab og solar street lights aron dili maglisod pagbiyahe ug pagtumod sa mga patigayon ang mga Sugboanon ilabi na sa bukiran.
Gawas niini, gisaad usab ni Garcia ang pag-upgrade sa provincial hospitals pinaagi sa pagdugang sa bed capacity, dugangan ang healthcare workers ingon man mga gamit sa mga hospital lakip na ang ambulansiya nga libreng magamit sa mga Sugboanon.
Sa kasamtangan, nag ung-ong na ang application sa buhatan sa Department of Health (DOH) alang sa pag-upgrade sa provincial hospitals sa dakbayan sa Danao ug Bogo.
“We already have pending applications before the DOH... This will allow us to put in more specialists, and doctors, and we can now increase our bed capacity, doctors, and upgraded medical equipment will be made available to our hospitals,” pahibawo ni Garcia.
Subay sa pagbukas na sa face-to-face nga mga klase, mohatag usab og school supplies ang Kapitolyo ngadto sa mga tinun-an.
Sa natad sa edukasiyon, ipadayon usab sa kagamhanan ang pagsuporta sa mga tinun-an sa Sugbo sa skills training program nga pasiugdahan sa Technical Education and Skills Development Authority (TESDA).
Sanglit nagpadayon ang pandemya sa nasud, ipadayon usab ni Garcia ang sustainable programs sama sa Sugbusog ug Sugbo Negosyo nga nahimugso atol sa pagsulbong sa coronavirus disease (Covid-19). Apan sa padayong pagkunhod sa mga kaso sa Covid-19 sa probinsya, gilaraw usab ni Garcia ang pagbalik na sa Pasigarbo sa Sugbo festival ug ang tour packages sa Suroy-Suroy sa Sugbo karong tuiga.
Ang turismo usa sa gikonsiderar ni Garcia nga economic driver sa probinsya ilabi na sa daghang mga Sugboanon nga natabangan niini. Sa kasamtangan, gipasalamatan usab ni Garcia ang tanang mga Sugboanon nga nihatag sa ilang pagsalig kaniya nga mamuno pag-usab sa lalawigan.
“Over 1.4 million Cebuanos gave their vote of confidence, agreeing with the policies that have laid down during the pandemic even though they were a few critics that seem to dominate social media,” matod ni Garcia.
Si Garcia nakakuha og 1.4 milyones ka botos atol sa piniliay sa Mayo 9 batok ni former Tourism Sec. Ace Durano, sa margin nga moabot og 1.1 milyones ka botos.