Lalaki nga gustong makigbalik sa iyang kapuyo kay gimingaw gisikop sa Criminal Investigation and Detection Group Mandaue City Field Unit human gi-upload niini ang hubo nga mga hulagway sa iyang ex-partner, tungod sa kasuko nga wala mosugot ang biktima nga makig-uli kaniya.

Ang dinakpan gi-ila nga si Rolando Jumao-as Sumalinog, taga-barangay Day-as, Lungsod sa Cordova.

Si Sumalinog gidakop sud sa usa ka mall nga nahimutang sa Barangay Pajo, Dakbayan sa Lapu-Lapu niadtong Mayo 12, 2022 sa hapon.

Matod ni Police Colonel Ireneo Dalogdog, regional chief sa CIDG7, nga nidangop sa ilang buhatan ang kanhi live in partner ni Sumalinog nga gitago sa ngalang Iris, taga lungsod sa Tuburan ang nireklamo sa gihimong pagpanghulga.

Nasayran nga sulod sa 12 ka tuig nga nag-ipon ang duruha apan nagbuwag kay matod pa wala makaantos ang biktima tungod kay giingong dagmalan si Sumalinog ilabi na kon magduda nga aduna siyay laing lalaki.

MAKIG-ULI

Apan natingala nalang si Iris nga mi-chat ang suspek nga gusto niya nga makig-uli ug makighilawas gumikan kay gimingaw na siya niini.

Kon dili mosugot ang biktima, nibahad si Sumalinog nga iyang ipakatap sa ilang mga higala ug kabanay ang ilang hubo nga lawas ug video.

Wa lang magtagad ang biktima sa hulga sa lalaki apan niadtong miaging semana nasayod nalang siya nga gipakatap na sa suspek ang ilang mga law-ay nga hulagway.

Wa pa matagbaw mihulga sab kini nga laing hubo nga mga hulagway ang iyang ipangpasa sa ilang mga higala kon dili gyud kini makig-uli ug makig-sex kaniya.

MIDANGOP

Tungod niini nabalaka na si Iris ug nangayog pakitabang ngadto sa kapulisan aron mahunong na ang pagpang-blackmail ni Sumalinog.

Mihimo gilayon og entrapment operation ang CIDG Mandaue Field Unit nga gipangulohan ni Police Major Alain Jericho Cuyopan.

Nagsabot ang duha nga magkita sa usa ka mall sa Dakbayan sa Lapu-lapu ug sa dihang nagkatagbo gidakop dayon kini sa mga operatiba.

“Nakita niya na yung mga nude photos at saka videos ay ipinagkalat na pala ng kanyang live in partner at tinatakot pa siya bina-blackmail sya, kaya naisipan niya na pumunta dito sa CIDG RFU 7 para maghingi ng tulong, at agad-agad naman ang ating mga operatiba nag responde kaagad at itong suspect ay nahuli,” matod ni Dalogdog.

KASO

Gumikan sa gihimo ni Sumalinog mag-atubang siyag kaso nga kalapasan sa Republic Act 9995 kun Anti-Photo and Video Voyeurism Act of 2009.

Hayan lain pa nga kaso nga isang-at sa biktima nga mao ang kalapasan sa ‘Violence Against Women and Children’ tungod sa pagpanapat niini ngadto kaniya nga giisip nga bug-at nga krimen.

Gibutyag ni Dalogdog nga sulod ning tuiga duha na ka kaso sa pang-blackmail sa babaye ang ilang nasulbad diin mobahad ang mga suspek nga ilang ipakatap ang hubo nila nga hulagway sa internet.

Tambag sa kapulisan ilabi na ngadto sa mga kababayen-an nga sa higayon nga mohimo og intimate nga kalihokan ngadto sa ilang partner, likayan ang pagkuha og video o hulagway aron dili magamit sa pag-blackmail ilabi na sa higayon nga dili na magkasinabot o mosangpot ngadto sa panagbuwag sa ilang relasyon.

IN LOVE PA GIHAPON

Samtang si Sumalinog sa iyang bahin nagmahay sa iyang gihimo ug nangayo og pasaylo ngadto sa iyang kanhi ka-live in.

Matod pa nga napugos siya sa paghimo sa ingon tungod kay gusto niyang mabalik ang ilang naandan nga relasyon ilabi na nga in love pa gihapon siya ngadto ni Iris.