Kon taga southern Cebu ka, angay kang managana sa imong pag-uli o kon duna kay arion sa Cebu City ug uban pang mga dapit nga lapas sa dakbayan sa Talisay.

Kini kay karong Biyernes, Mayo 20, 2022, sugdan na og trabaho sa Department of Public Works and Highways (DPWH) ang pag-aspalto sa Mananga bridge sa Barangay Tabunok, Dakbayan sa Talisay.

Ang lane nga unahon mao ang agianan sa mga sakyanan nga padung sa southern Cebu.

Busa, kinahanglan nga sirhan ang mao nga lane gikan sa trapiko sugod sa alas 9 sa gabii hangtod sa alas 5 sa buntag, pahibawo ni City of Talisay Traffic Operations and Development Authority (CT-TODA) chief Jonathan Tumulak.

Matod ni Tumulak, ang lane nga subayan sa mga sakyanan nga paingon sa Brgy. Tabunok himuong two-way busa gipaabot ang paghinay sa dagan sa trapiko.

Tambag ni Tumulak nga kon mobiyahe man gani agi sa Mananga bridge sa gabii o sa kaadlawon, maneguro sa pagsayo o pagplano sa lakaw aron dili matrapik.

Human sa pagtrabaho sa mao nga lane, dason ni Tumulak, isunod ang habig nga agianan usab sa mga sakyanan nga mopadulong sa Tabunok.