KAWATAN ug nagdula og ilegal nga druga, kini ang gibutyag sa kapulisan sa San Pedro Police Station labot sa pagpusil-patay sa 20-anyos sa Purok 9 Balite, San Rafael, Barangay 9-A, Davao City niadtong Lunes sa gabii, Mayo 16, 2022.

Sumala ni Police Major Benkalin Baluan, hepe sa San Pedro Police Station nga personal nga bangi ang posible nga gitan-aw nga anggulo sa krimen.

Giingon ni Major Baluan nga posible dunay nakabangi ang biktima ug gipanimaslan kini hinungdan nga napatay.

"Ang record ani minor pa siya... sa barangay notado siya nga maldito, pasaway... katong minatay isa to sa kawatan diha sa area nato, iyang amahan na mismo ang nag-confirm tapos nagadula pud to siya og drugs although dili diri naga deal sa atong area naa to’y nadakpan nato sa silingan nila, pagdakop ato nilayas siya kay mora'g napasanginlan ata. Basta naay mga anggulo ana nga atong ginatan-aw ron, so ongoing pa gihapon atong investigation," sulti ni Major Baluan nga nahinabi sa dxDC RMN Davao.

Ang biktima nga si C-Jay Alegado, alyas Dongcute, residente sa nasangpit nga dapit ang gihaya na karon sa kapilya sa ilang lugar.

Nasayran nga misulod sa internetan ang biktima diin gisundan kini sa mamumuno dayon gipusil.

Nakaangkon og samad pinusilan sa liog ug ulo ang biktima nga maoy hinungdan sa hinanaling kamatayon niini.

Gikabutyag nga duna na'y ginalantaw ang kapulisan nga person of interest sa pagpamusil patay sa batan-on.