MAS hugot nga seguridad ang ipatuman sa Dakbayan sa Davao kon mahinayon ang oathtaking ni outgoing Davao City Mayor ug presumptive Vice President Sara Duterte-Carpio.
Sumala sa Davao City Police Office (DCPO), nga mas pahugtan pa ang seguridad sa maong mga takna alang sa usa ka makasaysayanong hitabo sa ning dakbayan.
Gikanayon ni DCPO spokesperson Police Major Ma. Teresita Plaza-Gaspan nga ning kasamtangan wala pa nila masayri asa dapita ning siyudad mohurar ang umaabot nga bise presidente nga matigayon Hunyo 19, 2022.
Giingon niini nga andam na sila sa security plan, partikular sa mga security personnel nga ipang-deploy sa venue.
"More than the standard nga security plan ang pagahimuon kay dako siya na event," ingon ni Major Gaspan.
Dugang ni Gaspan nga mas giandam pa nila ang ilang han-ay gumikan sa posibleng pagbutho ni outgoing President Rodrigo Duterte kinsa moduyog sa oathtaking sa iyang anak, apan wala pa kini kompirmasyon ug wala sab gibutyag ni Mayor Inday.
Nagpahimangno sab si Plaza-Gaspan ngadto sa mga moduyog sa oathtaking nga likayan ang pagdala og backpack ug dili mag-jacket ingon man gipahimangnoan ang mga ginikanan nga kun mamahimo di magdala og mga bata sa maong programa.
Sa programa ni Mayor Sara sa Davao City Disaster Radio (DCDR) niadtong Lunes, Mayo 16, 2022, iyang giingon nga matigayon ang oathtaking karong Hunyo 19, 2022 human nga madeklara siya sa Senate ug House of Represenatives nga mananaug.
Ang petsa sa iyang inagurasyon, matud niya, gikatakda sa mas sayo nga eskedyul aron personal siyang makatambong sa oathtaking sa iyang running mate nga si presumptive President Ferdinand "Bongbong" Marcos, Jr.
Ang mayor nagkanayon nga tuyo niya nga ipahigayon ang iyang inagurasyon sa siyudad aron makasaksi ang iyang mga lokal nga supporters sa iyang oathtaking.