Napakyas si Efren “Bata” Reyes sa semifinals sa men’s one-cushion carom kagahapon, Mayo 18, 2022 sa 31st Southeast Asian Games sa Ha Dong Gymnasium sa Hanoi, Vietnam.
Sama sa gilauman, ang gitawag og “The Magician” nasugamak sa kapildihan, 100-55, batok kang Tran Thanh Tu Nguyen sa Vietnam, 100-55.
Hinuon dili hingpit nga kapakyasan ang nasinati ni Reyes gumikan kay nakabira man gihapon siya og bronze medal taliwala sa kapildihan.
Sa sayo pa, ang billiard national coach ug kumpare ni Reyes nga si Francisco “Django” Bustamante miangkon nga nagkinahanglan og milagro si Reyes nga modaog ning sangkaa gumikan kay kinaham kaayo sa Vietnam kining maong natad sa dinumbolay.
Natinuod ang pangagpas ni Bustamante ug wala’y milagrong nahitabo.
Sa sayong pa lang sa karambolahay, nalubong na’g maayo si Reyes, 37-11, ug wala na kini nakabangon pagbalik.
Sa sayo pa, gilupig ni Johann Chua si Carlo Biado, 9-6, sa All-Pinoy finals sa men’s 9-ball pool singles event ug nadungagan ang gold medals sa Pilipinas.
Kini maoy ikaduhang gold medal sa billiard team sa Pilipinas sunod sa nabira sa Cebuana nga si Rubilen Amit sa women’s 9-ball singles.
Gikan sa 5-5 nga panagtabla, si Chua nakasagunson og daog sa nagsunod nga tulo ka racks aron pagposte og 8-5 nga rekord.
Midaog pa si Biado sa nagsunod nga rack apan didto ra kutob ang iyang pagpanghudlat.
Si Biado maoy mihipos sa silver medal.