Mahimo nang dili na molukat og bag-ong special permits ang mga operator sa public utility vehicle (PUV) hangtod Mayo 21, 2022.
Kini human gilugwayan ni Regional Director Eduardo Montealto Jr., ang validity sa ilang special permit hangtod sa Sabado, Mayo 21, karong semanaha.
Sa paghatag og extension sa special permit, matod ni Montealto nga automatic usab nga na-renew ang ilang quick response (QR) code.
“In the exigency of service, all special permits are extended up to 21 May 2022. In view hereof, after 21 May 2022 all special permits are deemed canceled unless another extension will be issued,” tipik sa direktiba ni Montealto.
Apan kadtong mga operator kinsa adunay mga bayranan gumikan sa mga kalapasan, matod pa ni Montealto nga automatic usab nga kanselado ang ilang mga special permit.
Ang public utility vehicles nga mobiyahe gawas sa ilang tagsa-tagsa ka mga rota gawas sa ilang prangkisa nga walay special permit gikonsiderar sa LTFRB 7 nga colorum ug adunay dakong multa nga nagpaabot kanila kon sila madakpan.
Ang LTFRB 7 unang nihatag og extension sa mga special permit kutob niadtong Mayo 13, tulo ka adlaw human sa national ug local elections apan nakahukom si Montealto sa paglugway og dugang usa ka semana gumikan sa nakitang panginahanglan aron usab nga dili na maglukat og bag-ong permit ang mga operator.