Sugdan na pag-apod-apud sa kagamhanan sa probinsya sa Sugbo ang school supplies nga gitagana sa mga tinun-an sa Kinder hangtod sa K-12 subay sa pagbalik na sa face-to-face classes sa mga pampublikong tunghaan.
Mao kini ang gipahibalo ni Cebu Governor Gwendolyn Garcia mga usa ka semana kapin human siya gi re-elect sa mga Sugboanon niadtong milabayng eleksiyon sa Mayo 9, 2022.
Matod ni Garcia nga gawas sa mga notebook ug pad paper, kompleto usab kini sa lapis, ballpen ug crayons alang sa mga kindergarten.
“ I am glad that we will now be back to face to face classes. We are now be readying inig opening of classes in August nga ang tanan natong Kinder, Grade 1, Grade 2, Grade 3, tagaan natog school bags again, the complete school supplies up to K12 and naa nay notebooks, naay padpaper, ballpen and for the kindergarten naay crayola. Ato nang I distribute karong August,” matod ni Garcia.
Subay niini, gusto usab sa gobernador nga sugdan ang feeding program sa mga tunghaan karon nga mobalik na pagtungha ang mga tinun-an.
Kini ipaagi sa pag integrate sa Sugbusog Program sa mga tunghaan.
“I am also thinking of integrating the Sugbusog Program to a feeding program for our school children. They are asking me unsaon mani nimong dako kaayo ang atong SEF (Special Education Fund). Well, primarily I want to spend it on our children. I want to spend it on our students. I’m looking for that program but I want now to make it evolve into a school feeding program kay at least ang ako unta, no child should go hungry,”matod ni Garcia.
Ang Sugbusog Program unang nagsugod niadtong 2020 sa pagsulbong sa pandemya sa nasud aron matabangan nga maka sustiner ang matag Sugboanon pinaagi sa makuhang ani sa mga pananom niini.
Sa Abril 2021 gipahibawo ni Garcia nga plano usab niya nga buhaton kini sa mga tunghaan kon mahibalik na ang klase aron may magamit alang sa feeding program sa tanang mga tinun-an.
Kapin na sa duha ka tuig nga ang nasod, apil na ang Sugbo nga wa makapahigayon og face-to-face classes tungod sa coronavirus disease 2019 (Covid-19) pandemic.
Pipila ka mga buwan ang nakalabay, duna nay mga tunghaan sa lalawigan sa Sugbo nga nagpahigayon na og limitadong face-to-face nga klase.