Ang Cebu2World Development Inc (C2W) ug Cebu City Government nilugway og duha ka adlaw nga Night Market sa Carbon aron pag-atiman sa mga dumoduong, Mayo 18, 2022.
Si Market Administrator Raquel Bohol-Arce niingon nga gawas sa adlaw nga Dominggo, ang C2W ug City Hall niapil sa adlaw nga Biyernes ug Sabado gumikan sa hangyo usab sa vendors nga sugdan sa alas 5:00 sa hapon hangtod sa alas 10:00 sa gabii.
Ang night market sa Carbon sa adlaw nga Biyernes ug Sabado adto ipahigayon sa espasyo duol sa viaduct sa South Road Properties (SRP) apan inig ka Dominggo, mobalhin sila sa ML Quezon boulevard buyon sa Unit-III , ang interim market.
Gawas sa mga lamian nga pagkaon nga gilangkuban sa sugba-sugba, linarang,litson, balbacua ug daghan pang uban, ang mga bisita usab sa Carbon Night Market makapahimulos sa live band sa maong mga adlaw aron paglingaw sa mga tawo.
Gipahibawo usab ni Arce nga kon adunay lingawlingaw, aduna say relihiyusong kalihukan sa Carbon sanglit matag Miyerkules adunay santos nga misa ang pagahimuon sa Sto. Niño Chapel diin nahimutang ang higanteng imahe sa Balaang Bata nga si Snr. Sto. Niño sa Snr. Citizens Park luyo sa Cebu City Hall nga sugdan alas 5:15 sa hapon ug sa Dominggo sa alas 4:00 sa hapon.
Gihulagway ni Arce nga naghinayhinay og pagdaghan ang mga tawo sa Carbon human gipasiugdahan sa C2W ang mga kalingawan matag Dominggo ug sa miaging duha ka Biyernes ug Sabado, ang halin sa mga vendors nisaka na usab.
Si Arce nagkanayon nga sa pagkakaron, gitutokan una sa night market sa Carbon ang mga tinda nga pagkaon ug sa mosunod nga semana, posible na nilang iapil ang uban nga mga tinda nga gipangita sa mga tawo sama sa night market sa Colon kaniadto.