Dalaga nakalingkawas sa tinong kamatayon human gitulis ug gidunggab pa, alas 10:30 sa gabii sa Martes sa Barangay Magdugo, dakbayan sa Toledo.

Ang biktima giilang si Jolina Lawog Lawog Trays, 21, dalaga, working student,taga Guinkamote, Brgy. Captain Claudio, Toledo City.

Wala na igkita ang suspek nga si Kenneth Purisima, 31, ulitawo, taga Magdugo.

Ang suspek wala na maabti sa mga silingan ug mga pulis nga nigukod kaniya.

Si Police Senior Master Sgt. Marciano Suarez, Jr., imbestigator sa Toledo Police Station nga nahinabi sa Superbalita Cebu, nagkanayon nga ang biktima natulog niadtong higayuna.

Nakabati siya nga dunay saba nga niabli sa pultahan.

Iyang gisusi sa pagtuo nga iyang amo nga si Zozima Abendan Taran maoy nangabli, pero kalit siyang giataki sa suspek, gidunggab sa nagkadaiyang bahin sa lawas.

Ang biktima nakahimo pa sa pagsukol ug nakadagan ang suspek, nadala iyang selpon nga mobalor og P7, 999.

Nasuta nga si Purisima nakasulod agi sa lungag nga gibutangan sa aircon sa stock room sa panimalay.

Si Trays nakaila sa suspek human ang sinina nga gitabon sa nawong natagak atol sa ilang nilayugay.

“Nagtuo mi nga posibling ang suspek manglugos unta sa biktima, pero nakamata man maong gitulis nalang niya,” sumala ni Police Senior Master Sgt. Suarez.

Ang biktima luwas na sa makuyaw nga kahimtang.

Kasong robbery with frustrated murder ang gipasaka sa kapulisan batok sa suspek.