DUMOT sa pamilya ang gitan-aw sa mga awtoridad nga motibo sa pagpamanhig sa magsuon alas 9:05 a.m., Miyerkules, Mayo 18, 2022, sa Datu Odin Sinsuat, Maguindanao Province.

Giila ang mga napatay nga sila Jafar Abdulgani Guiamad, 32, ug Nadjeer Guiamad, 16, mga molupyo sa Sitio Lamakan, Barangay Sapalan sa maong lungsod.

Gibutyag ni Datu Odin Sinsuat Chief of Police Lieutenant Colonel Assir Balindong nga nagsakay ang mga biktima sa usa ka Honda XR 200 nga motorsiklo paingon sa Cotabato City sa dihang nahitabo ang pagpamusil.

Giingong pag-abot sa mga biktima atbang sa Shariff Awliyah National High school sa Barangay Bugawas sa maong lungsod, mibutho ang wala mailhing mga armadong lalaki ug girapido sila gamit ang M16 armalite rifles.

Ang mga suspek dali sab nga miikyas sakay sa tulo ka mga motorsiklo paingon sa hilit nga dapit sa Datu Odin Sinsuat.

Mga biktima nga natusak-tusak ang lawas sa mga bala on the spot nga namatay.

Wala pa matumbok sa kapulisan sa Datu Odin Sinsuat Municipal Police Station ang bansagon sa mga suspek apan padayon ang ilang pagkalap og impormasyon alang sa daling pagkasikop sa mga mamumuno.