Nabantayan nga kanunay na nga moitsa sa gawas nga moabot pa sa three-point area ang Sugboanong higante nga si JuneMar Fajardo sa kampanya sa Gilas Pilipinas sa men’s basketball sa 31st Southeast Asian Games sa Hanoi, Vietnam.
Dili diay kini sulagma lang gumikan kay aduna kini pagtugot gikan mismo ni Gilas coach Chot Reyes.
“I think for June Mar to be truly effective in the international game, he has to expand his range and widen his repertoire,” pasabot ni Reyes nga napatik sa Spin.ph.
Hinuon giklaro ni Reyes nga ang produkto sa University of Cebu (UC) Webmasters pabilin niyang ipanghulga sa ilawom nga bahin apan sa panahon nga gikinahanglan, gitugtan kini niyang moitsa sa gawas.
Apan giklaro ni Reyes nga sa Philippine Basketball Association (PBA), dili angay moitsa sa gawas ang pambatong sentro sa San Miguel Beermen.
Sa laing bahin, ang Gilas ningposte na sab og dakong kadaugan sa miaging gabii, Mayo 18, 2022 ug ning higayuna, ang Singapore maoy biktima, 88-37.
Ning pagsuwat, ang Gilas aduna’y 3-0 nga rekord.