Lalaki sa dakbayan sa Tagbilaran, Bohol nag-viral sa social media tungod sa pagpagukod sa motorcycle patrol, nasikop kini dihang naabtan ug gibalhog sa selda sa Tagbiliran City Police Station.
Matud ni Police Staff Sergeant Krislam Baguil, beat patrol sa Tagbilaran police, nga niadtong Mayo 4,2022, Miyerkules sa buntags samtang siya nagpatrolya sa dan, ang suspek nga si Mark Gerven Culujara, hamtong, taga Tagbilaran, nasakpan niya nga walay helmet ug walay plaka ang motorsiklong gimaneho.
“Ingon ko, Sir, hunong sa, apan nipakusog hinuon og padagan, mao to nga nangayo ko og tabang sa akong kauban nga nagsunod nako,” matod ni Baguil.
Sa ilang pag ginugdanay, natingala usab si Baguil kay samtang iyang gigukod ang maong suspek nanigarilyo usab, hinungdan nga nagtuo ang pulis nga basin ug duna kini problema.
“Sa among paggukod, Sir, hapit pa gani siya makabangga og laing motor mao nga amo gyud gipahunong. Unya magsige pud siya og ingon nga wala koy brake, Sir, wala koy brake. Didto na ko na out balance kay pag-ambak niya sa motor, misipa siya atubangan sa iyang motor padulong sa akoa towards sa akoang motor, wala nako makontrol ang motor mao to tumba ming duha,” asoy ni Baguil.
Tungod sa gihimo ni Culujara, naipit ang tiil ni Baguil hinungdan nga nagtakiang siya nga naningkamot sa pagdakop sa suspek. Sa pagsusi sa pulis, si Culujara walay lisensiya ug walay dalang rehistro sa iyang motorsiklo.
Dugang ni Baguil, parolado si Culujara ug bag-o lang nakagawas sa prisohan sa kasong ilegal nga drugas. Napriso siya.