Gikonsiderar sa kapulisan sa Parian kun Police Station 1 sa Cebu City Police Office (CCPO) nga usa ra ang killer sa duha ka managlahing mga insidente sa pagpamusil patay niadtong Marso 30,2022 ug Mayo 9, 2022 sa Sityo Lawis, Barangay Lorega San Miguel, siyudad sa Sugbo.
Ang unang biktima mao si Arnie Nulan Puyat, 26, mensahero sa usa ka insurance company, lumolupyo sa Guadalajara, Barangay Guadalupe, siyudad sa Sugbo.
Niadtong Mayo 9 atol sa nasudnon ug lokal nga eleksiyon, si Bryan Mabaga, 39, barangay tanod sa Lorega San Miguel, gipusil-patay atubangan sa tunghaan sa Barangay Zapatera.
Matud ni Police Major Albert Quilitorio, hepe sa Parian Police Station nga nahinabi sa Superbalita Cebu, nga sa ilang imbestigasiyon, ilang nakita nga managsama ra ang gunman nga nipatay kanila ni Puyat ug Mabaga.
Ilang nasuta nga si Puyat naalaan lang nga mao si Mabaga. Ang kapuyo ni Puyat igsuon ni Mabaga.
Sa wa pa ang pagpamusil, si Mabaga nagsugba og karneng baboy, apan nipuli si Puyat. Ang duha managsama og kolor sa gipangsul-ob nilang senina.
Si Puyat niadto sa balay ni Mabaga tungod sa birthday party kuyog sa iyang kapuyo nga manghud ni Mabaga.
Dugang ni Quilitorio nga sila nagtuo nga dako ang kasuko sa killer kang Mabaga sanglit gitinguha nila nga kuhaon ni bisan pa sa adlaw sa piniliay.
Nasayran usab sa Parian Police nga si Mabaga dunay nakontra niini nga usa ka grupo nga hayan nihimo sa planong dautan aron makapanimawos sa barangay tanod.
Usa sa nakita sa kapulisan nga aktibo si Mabaga sa kalihukan sa Lorega San Miguel nga posibleng tungod sa trabaho niini wala mauyoni sa mga nakontra sa gipatay nga tanod.