Ang mga opisiyal sa Department of Energy (DOE) ug Presidential Communications Operations Office (PCOO) ning-awhag sa mga konsumidor ug mga magpapatigayon sa pagdaginot sa enerhiya gumikan usab sa nasinati nga kalibutanong krisis sa ekonomiya.
Si Felix William Fuentebella, undersecretary sa DOE, nagkanayon nga ang ilang gihimo nasubay sa gilagdaan ni Presidente Rodrigo Duterte niadtong 2019 nga Republic Act 11285 kun Energy Efficiency and Conservation Act nga iyang gihulagway nga usa ka komprehinsibo nga balaod nga dili lang magtubag sa isyu sa kinaiyahan, kon dili apil na ang ekonomiya.
Si Fuentebella nagkanayon nga bisan nakatutok ang maong balaod sa pagpreserbar sa kinaiyahanan, apan ang pag-edukar sa mga konsumidor ug mga investor sa kamahinungdanon sa ilang gitawag og “green energy” dako og ikatabang sa nagkataas nga bayranan labi na sa kuryente sa pagpadagan sa ilang negusiyo.
“The economics of this is very good for the country. The economics of this is very good for the environment as well because once we change our behavior, once we change the investor’s behavior to invest on energy efficiency, on renewable energy (RE), create workshops on energy security in the Philippines,” padayag ni Fuentebella.
Matod sa Usec sa DOE nga adunay igo nga gidaghanon sa mga renewable energy (RE) developers apan kuwang pa ang ilang kaagresibo ug kadasig sa pagsagop sa lainlaing renewable energy sama sa solar, wind, geothermal ug uban pa atol sa ilang gilusad nga #EmerhiyangAtin information drive sa SM City Cebu.
Ang pagkonserbar sa enerhiya maoy nag-unang tubag sa nasod dihang naigo ang Pilipinas sa financial crisis diin nisaka pag-ayo ang presyo sa produktong petrolyo niadtong 2008.
Gipadayag usab ni Fuentebella nga ang nahitabo karon sa kalibotan sama sa pag-igo sa Covid-19, typhoon Odette ug ang kalibotanong epekto sa nahitabong gubat sa Ukraine ug Russia nga niresulta sa pagsaka sa mga batakang panginahanglan, dako og epekto ngadto sa mga konsumidor.
Samtang gipadayag ni Atty. Tristan de Guzman, director sa PCOO, atol sa iyang pagpamulong nga diha palang sa tagsa-tagsa ka mga panimalay ang pagkonserba sa energy, nagpasabot kini sa pag-ubos sa utility bills ug magamit alang sa laing galastuhanan sa balay.