Usa sa mga grupo nga nakapa-interes nako nga suroyon mao ang mga Moncado o naila sab nga mga Moncadista nga nahimutang sa bukirang barangay sa Sudlon II, Dakbayan sa Sugbo.
Ang Sudlon II molanat og usa ug tunga ka oras nga biyahe manukad sa Cebu City proper apan kon maggikan sa Transcentral Highway sa Busay, laing 30 ngadto sa 40 minutos sa sakyanan o motorsiklo paingon sa gamay nga komunidad nga nahimutang sa bukid.
Ang maong dapit nahisakop sa usa ka National Park, gipanalipdan ubos sa Central Cebu Protected Landscape Act of 2007.
Naaghat ko sa pagsuroy sa Sudlon mao ang usa ka dako nga konkreto nga estraktura nga matod pa katingad-an.
Natultolan nako ang lugar pinaagi sa abag sa Google Maps.
KASAYSAYAN
Ang Moncado Hotel nagsilbi nga general headquarters sa Filipino Crusaders World Army (FCWA), usa ka relihiyosong organisasyon nga gitukod ni Hilario Camino Moncado niadtong 1940s.
Ang tulo ka andana nga buidling adunay Olympic-sized nga swimming pool (50 ka tiil gitas-on). Ang maong desinyo sa istruktura daw sama sa publikong tunghaan.
Kaniadto, mamahimong mo istar sa maong edepisyo, apan gihunong una kini tungod sa pandemiya.
UNSAY NAA?
Sa akong pag-abot gisugat kog guwardiya nga nagsul-ob ug olive-green nga mga fatigue military uniform sulod sa guard house ug mihangyo kanako sa pagsulat sa akong ngalan sa guest logbook samtang siya nag-radyo sa usa ka tawo sa sulod ug mibayad ko og P25 nga visitor’s fee.
Nisugat sa akong panan-aw ang hawan nga dapit diin adunay mga rebolto sa tulo ka tawo, una (sa wala) mao ang Five Star General Federico E. Jayme, Supreme Commander-in-Chief Forces in the World, Philippine American Guerillas 1941-1945.
Ang tunga nga estatwa kang Moncado,Commander-in-Chief, Filipino Crusaders World Army Inc. Phil-American Guerrillas 1941-1945 ug gitukod ni Federico Jayme Moncado Colony, Sudlon National Park, Marso 14, 1945.
Ang kataposang estatuwa kay “Mr. Lorenzo Delos Reyes, Direktor sa Espirituwal nga Dibisyon.
Nalantawan nako ang Moncado samtang gawas sa compound gilibutan og kaumahan ug mga kahoy. Adunay silay mga sakop nga nagtikad sa umahan sa palibot.
KINSA SI H. MONCADO?
Si Hilario Moncado natawo niadtong Nobiyembre 4, 1898 sa lungsod sa Pondol, Balamban, Cebu. Base sa record sa Mission Bulletin, sa dihang nag-edad pa og 6 anyos mibiyahe siya sa nasud sa India aron magtuon sa College of Mystery and Psychic sa Calcutta.
Kaniadto, si Moncado nagsul-ob og uniporme sa kasundalohan ug nagtawag sa iyang kaugalingon nga usa ka “five star general.”
Nidagan usab siya pagka-Presidente niadtong 1946, nga nagduso sa Pilipinas nga hatagan og Dominion Status sa U.S. apan napildi siya ni Manuel Roxas.
Pagkahuman mibalik siya sa U.S. diin nahimo siyang prominenteng lider sa Filipino community sa West Coast ug namatay niadtong Abril 8, 1956 sa edad nga 57.
Si Moncado nakatukod na og mga kolonya dili lang sa Sugbo, kondili sa mga dapit sama sa Dansalan sa Lanao Del Sur ug Samal Island sa Davao.
Ang kasamtangang Presidente sa FCWA, si Henry Jayme, nagpabilin sa Moncado Hotel. Ang panguna nga pilosopiya ni Moncado alang sa FCWA mao nga ang tawo managsama sa Diyos.
Samtang nahingangha kaayo ko sa mga butang nga akong nasayran, wa nako mabantayi nga hapit na diay mosawup ang adlaw.