Sigun sa gipaabut gipasaka na sa pipila ka mga civic leader ang petisiyon nga naghangyo sa Supreme Court (SC) nga mandoan niini ang Senado ug Kongreso sa paghunong sa pag-canvass mga mga boto ni presumptive president Ferdinand “Bongbong” Marcos, Jr. Ang maong prayer for restraining order nasulat sa petition sa pagbali sa desisiyon sa Commission on Elections (Comelec) nga nag-dismiss sa kaso nga pagkanselar sa certificate of candidacy (COC) ni Marcos.

Ang mga petitioner mao sila si Fr. Christian B. Buenafe, Fides M. Lim, MA. Ediza P. Hernandez, Celika Lagman Sevilla, Roland C. Vibal, ug Josephine Lascano versus Commission on Elections, Ferdinand Romualdez Marcos, Jr., The Senate of the Philippines represented by the Senate President, The House of Representatives represented by the Speaker of the House of Representatives. Wala kitay kasayuran kon unsa ang desisyon sa SC niining maong petisiyon apan kon hatagan kini og konsiderasiyon sa korte mahunong ang pag-canvass sa mga botos ni Marcos.

Magpadayon hinuon ang pag-ihap sa mga botos ni presumptive vice president Sara Duterte Carpio. Kon ugaling modaug ang mga petitioner sa pagpakanselar ug pagdeklarar void ab initio sa COC for president ni Marcos, adunay kahigayunan nga mahimong presidente si Vice President Leni Robredo. Apan kon ugaling ang mahukman sa SC mao ang disqualification case ni BBM, ang napiling bise presidente nga si Sara Duterte Carpio mao ang mopuli kaniya sa Malacañang. Ang uban nagtuo nga human maproklamar si BBM nga matangtang lamang siya pinaagi sa impeachment. Matangtang gihapon siya kay makonsiderar man nga ang mao niyang qualification ug pagka-kandidato void ab initio man.

Nag-landslide victory si Lapu-Lapu City Mayor Junard “Ahong” Chan. Giharus sa iyang partido ang ilang kaatbang nga pinangulohan ni Kongresista Paz Radaza. Wa naman ko kasunod kon unsay binuhatan sa mga pulitiko sa Lapu-Lapu City apan wa ko magtuo nga wala gayuy bisan usa nalang ka kandidato ni Radaza ang modaug. Sa Mandaue City nangharus usab si reelectionist Mayor Jonas Cortes kay usa ra gyud ang nakalusot sa oposisyon nga si Konsehal Editha Cabahug. Daghan usab ang nanaug sa mga kandidato ni Cebu City Mayor Mike Rama batok sa BOPK ni kanhi mayor Tomas Osmena.

Sa dili madugay ilusad na ang “Angat Buhay NGO” ni Vice President Leni Robredo. Ang tumong ug tuyo niini mao ang pagpakig-away batok sa kawad-on. Buot niining maghiusa ang public ug private sector aron pagtabang sa panginahanglan sa mga pamilya sa halayo nga komunidad.

Maayo kaayo kining maong NGO basta dili lang ang giingon nga mahimo kining shadow government sa mga piniling opisiyal. Mahimo hinuon silang mobantay sa binuhatan sa mga opisyal sa gobiyerno basta dili lang lunlon pamulitika maoy ilang opisyo. Angay suportahan kining maong NGO bisan kon didto ka mobutar kang BBM niadtong miaging eleksiyon kay alang man kini sa kaayuhan sa kinabag-an.(msr1144@yahoo.com)