Editoryal: CCMC ug utang sa SRP

Editorial Art by John Gilbert Manantan
Editorial Art by John Gilbert Manantan



Usa sa mga prayoridad ni Mayor Michael Rama ning iyang laing termino mao ang hingpit nga pagbayad sa utang sa Dakbayan sa Sugbo sa loan niini sa Japan sa paghimo sa South Road Properties (SRP).

Naputol ang iyang tinguha sa pagbayad kay napilde man siya sa 2016 elections. Bisan gani ang paghuman sa nasugdan nga Cebu City Medical Center (CCMC) naapektuhan og maayo. Nahunong gyud og pipila ka mga tuig.

Karon nga gihatagan siya og makabungog nga mandato ug mayoriya na sila sa Konseho, kining duha ka dagkong mga tumong hayag nang matuman.

Kinahanglan nang tingban sa pagbayad ang utang sa SRP nga nag-agad sa dollar-peso rate. Karon lang, ubos kaayo ang balor sa peso batok sa dolyar. Kon mas lig-on ang dolyar sa peso, mas dako ang mabayran sa Cebu City sa iyang datahan sa utang. Ang budget unta niini kada tuig magamit kaayo sa paggasto niini sa ubang basic services nga gikinahanglan kaayo sa mga Sugboanon.

Bisag unsaon pagkwentada, mas makaayo sa Siyudad ang pagtingob sa pagbayad sa utang kay sa magpadayon sa pagbaguod sa pagdata.

Samtang kaanindot kon mahuman na ang CCMC sa mosunod nga tulo ka tuig sa termino ni Rama. Makapasigarbo na ang Cebu City nga isip harang dakbayan sa habagatan, duna na siyay 10 ka andanang nagbuntaog nga ospital nga kompleto sa mga kahimanan ug makaserbisiyo sa labing kabus. Kinahanglang gahinan sab ni og dako nga pundo aron ikapamalit og mga kahimanan sa ingon mahatag ang mga serbisiyong medikal nga mahal kaayo sa mga pribadong tambalanan.

Sa pagkakaron man gud, ang tanang mga medikal nga panginahanglan sa yanong mga Sugboanon natingob sa Vicente Sotto Memorial Medical Center (VSMMC). Gikinahanglan pa usab sa Siyudad nga makig-partner og pribadong mga ospital sa iyang medical program, sama sa pag CT scan, 2D Echocardiography ug uban pa. Sayon na lang sa mga kabus kon naa ni.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph