GUILTY sa kasong malversation of public funds subay sa kalapasan sa Republic Act 3019, or Anti-Graft and Corrupt Practices Act sila si kanhi kongresista Clavel Martinez, Board Member Celestino “Tining”Martinez III, Bogo City Vice Mayor Maria Cielo Martinez, Cresencio Verdida, Rhett Minguez, Rhodariza Kilantang, kanhi kongresista Paz Radaza ug Julieta Gonzales Quiño.

Kini subay sa uwahing hukom sa Sandiganbayan sa 6th Division sa Mayo 17, 2022.

Ang walo nakit-an sa hukmanan og rason nga silotan ug prisuhon, did-an sa paghupot og posisyon sa kagamhanan, langkatan sa katungod sa tanang retirement benefits ug pamultahon.

Gihukman sila si Clavel Martinez, Celestino Martinez III ug Crecensio Verdida nga mabilanggo gikan sa dili mominus 10 ka tuig ngadto sa 18 ka tuig nga maximum ug pamultahon og tag P7.1 milyunes matag usa ug pagkabilanggo sa ikaduhang kaso nga may multa usab nga P7.3 milyunes.

Sila si Minguez, Kilantang, Radaza ug Quiño mabilanggo sa dili mominus 10 ka tuig ngadto sa 17 ka tuig nga maximum ug susamang pagkabilanggo sa ikaduhang kaso nga may multa nga P7.3 milyones

Kahinumdoman nga gipasakaan og kaso ang walo tungod sa kadudahang pagbalhin sa P10 milyones nga public funds sa personal nga bank account ni kanhi 4th district congresswoman Clavel Martinez nga kanhi presidente sa Girl Scout of the Philippines.

Ang P10 milyones gikuha gikan sa Priority Development Assistance Fund (PDAF) o mas giila nga pork barrel alang sa anti-drug campaign.Sa maong higayon naglingkod pa isip mayor sa Bogo si Tining, municipal accountant si Verdida ug municipal treasurer si Minguez.

Si Radaza nilingkod isip treasurer sa GSP 2000 hangtod sa 2003; gipulihan siya ni Maria Cielo Martinez sa 2003; si Kilantang, maoy bookkeeper; ug si Quiño cashier-designate