Uyoan ug pag-umangkon nabalik sa selda tungod sa laing kaso samtang ang silingan maoy labing una niyang higayon nga siya nasikop sa buy-bust sa Philippine Drug Enforcement Agency (PDEA) 7 sa Sityo Ibabao, Brgy. Mambaling, siyudad sa Sugbo, pasado alas 8:00 sa gabii, Miyerkules, Mayo 18, 2022.

Ang PDEA 7 Regional Special Enforcement Team (RSET) maoy nihimo og anti illegal drug operation.

Si Leia Alcantara, tigpamaba sa PDEA 7, niila sa mga dinakpan nga sila si Manuel Panonce, 30, target sa ronda, ug uyoan niining si Nicolas Panonce, 44, ug silingan nga si Jayson Salandron, 25, kinsa unang higayon nasikop, pulos mga molupyo sa maong lugar.

Atol sa ronda, ang target sa buy-bust nga si Manuel nasakmitan og shabu nga mokantidad sa P68,000.

Matud ni Alcantara, usa ka semana ang pag-monitor sa kalihukan sa suspek una niila gihimo ang operasiyon.

Si Emanuel napriso na kaniadto sa susamang kaso apan ni-apply og plea bargaining.

Ang uyoan nga si Nicolas napriso na usab sa kasong pagpangawat.