MALITA, Davao Occidental —

MAAYONG kalidad sa edukasyon ug ang pagtabang sa mga magtutudlo maoy usa sa mga tinguhaon ni incumbent Davao City Mayor ug presumptive Vice President Sara Z. Duterte-Carpio human siya ang itudlong secretary sa Department of Education (DepEd) sa umaabot nga administrasyong Marcos.

Atol sa oathtaking ceremony sa mga elected officials sa probinsiya sa Davao Occidental didto sa DavOcc Gymnasium sa Malita Biyernes sa buntag, Mayo 20, 2022, giingon ni Mayor Sara nga usa sa iyang ginasulti atol sa iyang kampanya nga paninguhaon nga mahatagan og maayong kalidad sa edukasyon ang kabataan ug ang kaayohan sa mga teaching ug non-teaching staff.

Atubangan mismo sa daghang magtutudlo nga mitambong sa oath taking ceremony, gisaysay ni Mayor Sara ang tinuod nga reyalidad sa kahimtang sa mga magtutudlo diha sa ilang madawat nga suweldo.

Niya pa, nga subay sa saysay sa magtutudlo, nakita niya ang pinakasubo nga hitabo sa kinabuhi sa magtutudlo nga ang kadaghanan mokuha na lang og P1,000 ug duna pa’y moubos sa usa ka libo sa ilang ATM.

"Ang atong mga teachers nga nalubong sa utang, this is the sad reality sa atoang mga teachers, because nakita na nako when I was working sa Davao City as mayor," ingon ni Mayor Sara, kinsa misaysay nga dunay miduol kaniya nga usa ka magtutudlo sa kasikbit nga probinsiya sa Davao City kinsa nagpatabang sa usa ka subo nga suliran sa pagpangutang sa magtutudlo.

Tungod niini, ang umaabot nga DepEd secretary nanlimbasog nga unahon sa paghatag og pagtagad ang mga magtutudlo aron mahatud ang maayong kalidad sa edukasyon sa nasud.

"Gipaningkamotan nato nga makatutok ang atong mga magtutudlo sa problema sa edukasyon sa mga kabataan, ug diha sa paghatag og remedyo sa wala nagkadima-o sa ilang mga personal nga kinabuhi," ingon ni Mayor Sara.

Gipanghinaut niya nga kung mogamot siya hangtud sa unom ka tuig sa DepEd, iyang maalibyohan ang problema sa maong ahensiya.

"I only have six years to work with you, paningkamotan nato ang number one your welfare and number two the quality of education to our country; so I am soliciting your support, that we may find and we may come up, in something concrete to improve the welfare of the teaching and non-teaching staff of the Department of Education,” dugang niya.

Gihangyo sab ni Mayor Sara nga kinahanglan paspasan ang trabaho sa matag departamento sa DepEd aron matubag ang giingong kakuwangon diha sa pagpatuman sa mga butang alang sa maayong kalidad sa edukasyon sa kabataan, gumikan alang niya, sa magtutudlo magsumikad ang maayong kalidad sa edukasyon.

"I am truly excited to work to all of you [teachers]," panapos niya.

Sa laing bahin, gipasalamatan sab niini si Incumbent Davao Occidental Governor ug Congressman-elect Claude P. Bautista nga maoy usa sa dakong papel sa kalampusan niini karon.

Si Mayor Sara misaksi sa paghural ni Bautista kinsa mao ang iyang usa sa mga campaign managers nga nagpasiugda sa Ituloy ang Pagbabago Movement.