PERSONAL nga atraso ang gilantaw sa mga awtoridad nga motibo sa pagpusil-patay sa chief security sa National Food Authority (NFA) didto sa Tacurong City alas 7:15 sa gabii, Huwebes, Mayo 19, 2022.
Giila ang biktima nga si Aldrin Pintungan, 37, minyo ug nagpuyo sa Barangay San Pablo, Tacurong City.
Sumala kang Tacurong City Police Office Director Colonel Joan Maganto nga gisulod sa duha ka wala mailhing lalaki ang balay sa biktima ug gipusil kini gamit ang kalibre .45 nga pistola.
Abtik sab nga miikyas ang mga suspetsado sakay ang motorsiklo paingon sa hilit nga dapit sa dakbayan, samtang si Pintungan namatay on the spot human makahiagom og samad sa ulo, tiyan ug dughan.
Giingong sa wala pa ang hitabo, nakadawat og hulga sa kinabuhi ang biktima apan padayon pa kining gisusi sa kapulisan sa Tacurong City Police Office.