Gilaumang mas daghang Sugboanon sa probinsya ang mahatagan og kahigayonan nga makatungha sa kolehiyo karon nga gilagdaan na isip balaod ni Presidente Rodrigo Duterte ang pagpabarog og campus sa Cebu Technological University (CTU) sa lungsod sa Liloan ug Borbon.
Ang Republic Act 11751 nga gipangamahanan ni reelected Fifth District Representative Vincent Franco “Duke” Frasco gipirmahan ni Duterte sa Abril 27, 2022.
Human nidaog sa 2019 nga eleksiyon, usa sa gisaad ni Frasco mao ang pagsulong sa maayong edukasiyon sa mga konstituente sa kinto distrito.
“Not only will it provide savings in tuition and other fees to the residents, but more importantly, it will fulfill the State’s policy to provide access to quality tertiary education for all,” matod ni Frasco.
Unang giduso ni Frasco ang House Bill No. 4740 ug HB No. 4741 alang sa pag pabarog og CTU satellite campus sa Liloan ug Borbon.
Ang duha ka House bills giusa ug gihulipan sa House Bill 6877 nga inay satellite campuses, gitugotan niini nga mahimong stand-alone CTU campuses na sa lungsod sa Liloan ug Borbon.
Sa Hunyo 4, 2020, giaprubahan ang bill ug gi-transmit sa Senado sa Hunyo 8, 2020.
Si Senador Joel Villanueva nga nangulo sa Senate Committee on Higher, Technical and Vocational Education maoy ni-sponsor sa bill sa plenary sa Septiyembre 28, 2021 ug hingpit nga giarubahan sa Enero 17, 2022.
Gidala kini sa opisina sa Presidente diin giaprubahan sa Marso 30, 2022.