“More than 50% na ang atong accomplishment.”
Kini ang paghulagway ni Atty. Jose Daluz III, chairman sa Board of Directors (BOD) sa Metro Cebu Water District (MCWD) sa nagpadayon nga construction sa JE Hydro and Bio-Energy Corporation nga maoy mo-supply og 20,000 cubic meters per day sugod karong Septiyembre, 2022.
Si Daluz nagkanayon nga base sa kontrata nga gilagdaan sa JE Hydro ug sa MCWD, mag-atubang og 100% nga penalty ang contractor kon mapakyas sila pagpaagas sa tubig gikan sa Barangay Lusaran paingon sa Barangay Busay ug kasikbit nga mga bukirang barangay sa tinubdan sa tubig.
“September man ang ilang deadline, mao nang ilang gipaspasan aron dili sila maka-penalty kay September man ilang commitment unya og dili sila makakuha sa ilang commitment, they will be penalized 100% of the supposed deliveries.”
Ang chairman sa MCWD nagkanayon nga sa higayon mapakyas ang contractor, magbayad sila og P1.3 million matag adlaw ngadto sa MCWD kun P65 per cubic meter sa 20,000 cu.m./day.
“I think on-time or advance ni sila and I am very happy on how they conducted the construction,” dugang ni Daluz.
Sa kasamtangan, naabot na sa Barangay Busay ang pagpanaod sa JE Hydro sa ilang mga pipe ug padayon usab ang ilang pagtaod sa mga steel pipe sa Barangay Agsungot, Cambinocot nga mopaingon sa kasikbit nga mga barangay aron usab sila mabahinan sa tubig mainom.
Ang MCWD adunay duha ka higanteng reservoir nga tukoron sa Barangay Busay nga gihulagway ni Daluz nga padayon na usab nga gihimo sa contractor samtang laing pipe laying ang ilang himuon paingon sa Busay, Apas, Lahug ug kasikbit nga barangay.