Walay pagbahar si Olympic gold medalist Hidilyn Diaz sa pagpanghakot og medalya aron idugang sa iyang koleksiyon.
Kagahapon, Mayo 20, 2022, si Diaz nilangkat na sab og laing gold medal sa women’s weightlifting 55kg event sa 31st Southeast Asian Games sa Hanoi, Vietnam.
Si Diaz, kinsa maoy labing una ug kasamtangang bugtong nga nakatunol og Olympic gold medal sa Pilipinas, mialsa og 206 kgs. sa kinatibuk-an aron angkunon ang kadaugan.
Nakaalsa siya og 92 kgs. sa snatch ug 114 sa clean and jerk.
Lima ka mga kaparang ang gipilde ni Diaz lakip na niini si Sanikun Tanasan sa Thailand, kinsa gold medalist sa 2016 Rio Olympics.
Kini maoy ikaduhang gold medal nga naangkon ni Diaz sa matag duha ka mga tuig nga kompetisyon. Midaog sab siya og bulawan sa 2019 nga edisyon.