Editorial: Krisis sa pulitika

Duha na ka semana kapin gikan sa nasudnon ug lokal nga piniliay niadtong Mayo 9, 2022, Lunes. Apan daghang labaw sa botos ang wala pa maproklamar tungod sa wala-ug-tuo nga protesta sa ilang kaatbang.

Kon dili maproklamar sa Commission on Elections (Comelec) hangtod sa Hunyo320, 2022 nga kataposan sa termino sa kasamtangang naglingkod sa pwesto, unsay manitabo? Dunay dakong kahaw-ang sa kagamhanan. Motumaw ang dugang kasamok.

Si Senate President Vicente Sotto III, usa sa mga napildi nga kandidato sa pagka bise presidente sa miaging eleksiyon, nipadayag sa iyang kabalaka bahin sa sitwasyon sa sayong nag-una sa ihap sa botos sa pagka presidente nga si Ferdinand Marcos, Jr.

Si Marcos nikuha og kapin sa 31 milyunes nga botos nga halos katunga kini sa registered voters nga kapin sa 65 milyunes. Ang nabilin nabahinbahin sa ubang kandidato diin si Bise Pres. Leni Robredo nikuha og dakong pahat apan layo sa botos sa nag-una.

Nipasaka og kaso sa Korte Suprema aron pagpugong sa deklarasiyon ni Marcos ang susamang grupo nga nisuway og babag sa certificate of candidacy (COC) niini.

Sumala sa taho, buot sa grupo nga ang ikaduhang dako og botos sa pagka presidente maoy ideklarar sa Comelec.

Dili kaha mosamot ang kagubot? Lawom kini nga isyu busa atong itugyan sa mga batid sa balaud, diin ang Korte Suprema.

Ang kabalaka ni Sotto dunay kaanggid sa pipila ka mga lokal nga kagamhanan.

Usa ka katungod ang pagreklamo o kwestiyon sa proseso sa pinilay. Apan kon makamugna og kahaw-ang sa liderato, dili usab maayo.

Ang katawhan nga sentro sa pagserbisyo, matigaw na hinuon ug padayong masiaksiak tungod sa pulitika.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph