Ang yaya ug iyang boyfriend giingong nagkunsabo sa pagdagit sa upat ka buwan nga babayeng masuso, apan pinaagi sa abag sa publiko gamit ang Facebook, nasikop ang duha alas 9:10 sa Huwebes sa gabii, Mayo 19, 2022 sa usa ka balay sa Brgy. Obong, lungsod sa Dalaguete, habagatang Sugbo.
Sila si Adelyn Homicillo Letegio, 36, taga Brgy. Valencia, Alegria ug Monico Plando, 30, ulitawo, mag-uuma, taga Calugtan, Brgy. Catulohan, Dalaguete, nasikop sa joint hot pursuit operations sa kapulisan sa Alegria Police Station pinanguluhan ni Police Lt. Alexius Tangub, hepe sa Alegria Police ug Police Major Gilfred Baroman, hepe sa Dalaguete Police Station.
Si Tangub nga nahinabi sa Superbalita Cebu nagkanayon nga ang duha nagtinabangay sa pagdagit kang Aleeza Lodovice De La Peña, taga Sitio Sangi, Brgy. Madridejos, Alegria.
Nagtuo ang kapulisan nga giplano nila ni Letegio ug Plando ang pagdagit sa masuso kay ang lalaki kanunay magbisitahan sa balay nga gialagaran sa babaye.
Ila pa untang iparehistro ang bata isip ilang anak ug nasayran nga ang duha nagtinguha sa pagpahimo og identification (ID) card.
Si Letegio wala mohatag og pamahayag ngadto sa kapulisan samtang nagsige og hilak.
Si Plando usab nanghimakak nga may kalambigitan siya sa pagdagit sa bata nga iyang giangkon nga ilang anak ni Letegio.
FACEBOOK
Si Tangub nibutyag nga nasubay nila ang mga suspek pinaagi sa abag sa mga higala ni Letegio kansang komunikasiyon gipaagi sa Facebook Messenger.
Nakatabang usab ang mga Facebook post nga gipasa-pasa sa pagpangita sa masuso.
Sumala ni Tangub, nga human nahanaw ang bata, dali silang nikontak kang Letegio pinaagi sa mga higala.
Dihang nakontak sa FB Messenger, si Letegio giingong nitug-an nga gidala niya ang bata sa Negros, apan wala nituo ang kapulisan.
Nitug-an siya nga nasayod na siya nga gipangita siya sa kapulisan ug ang masuso.
Giingong nipahibawo na sab si Letegio nga toa na sila sa Bohol, dayon sa Siquijor samtang gipaneguro nga luwas ang masuso.
Samtang nagsige og pangita ang kapulisan, dunay nakapahibawo kanila nga sila si Letegio ug Plando naa ra sa kabanay sa Brgy. Obong nagsaka.
Matod ni Tangub nga ilang nasayran nga si Letegio nidala sa bata gikan sa Alegria paingon sa lungsod sa San Fernando.
Gikan sa San Fernando niadto sa Carcar diin siya gisugat ni Plando og motorsiklo, diin sila nagbalhinbalhin og dapit.
“Naay knowledge ni lalaki. Kunsabo sila sa kremin kay nagbalhinbalhin silag laing lugar. Kon wala pa, dili unta nila itago ang bata,” dugang ni Tangub.
Si Tangub niingon nga dili nila masalikway ang posibilidad nga ang bata ibaligya sa mga suspek.
Si Letegio dunay lima ka mga anak sa iyang bana samtang si Plando yano nga mag-uuma. /