Kapin sa 100 ka mga pulis sa Central Visayas gipangtaktak sa serbisyo human nahukman nga sad-an sa ilang mga kaso nga giatubang, kasagaran kanila nalambigit sa illegal nga drugas ug pangabuso ngadto sa ilang sakop sa pamilya.
Moabot ngadto sa 21,000 na ka mga police personnel tibuok Pilipinas ang nasilotan sukad 2016 hangtod 2022 nunot sa nagka lainlaing mga kaso nga giatubang niini.
Sa maong gidaghanon, dul-an sa 6,000 ang gipang taktak sa serbisiyo tungod sa kasong grave misconduct, dul-an sa 11,000 ang nangasuspenso samtang 1,150 ang na demote ang rango.
Sa Central Visayas, adunay 341 ka police personnel ang nahukman sa ilang mga kaso, 105 ang gi-dismiss sa serbisiyo, 205 gipangsuspenso ug 31 ang na-demote sa ilang mga ranggo.
Matod ni Police Brigadier General Elizalde Quiboyen, hepe sa Regional Internal Affairs Service (RIAS 7), tulo ka mga ahensiya sa PNP ang modungog sa kaso sa mga pulis.
Kini mao ang Discipline, Law and Order Section (DLOS 7) ug ang Regional Investigation and Detective Management Division (RIDMD 7) diin kadtong mga pulis nga nalambigit sa illegal nga drugas sila ang morekomendar sa regional director sa PNP sa silot nga ipahamtang kanila.
Kasagaran sa mga kaso nga gihuptan sa RIAS 7 mao ang violence against women and their children (VAWC) ug mga pulis nga nagpositibo sa paggamit sa illegal nga drugas atol sa kinalit nga drug test nga ilang girekomendar nga ipataktak sa serbisiyo.
Mamahimo pa hinuon nga makaapilar ang maong mga pulis ngadto sa National Police Commission (Napolcom) kon sa ilang tan-aw huyang.
Sigun ni Quiboyen nga dako kaayo og mawagtang sa usa ka pulis kon mahukman nga masuspenso og usa ka buwan sanglit tanang mga benepisiyo niini mawagtang og usa ka tuig, sama sa tanang bonus ug uban pa.