Garcia: Patas a Pigampa (Balanced Vision)

“Ing maka-Dyos a lumbe mamye dalan king kaligtasan

at alang lalakwang pamagsisi, dapot ing makalabwad a lumbe

magdalang kamatayan.”

~Kadwang Korintu│Dangka 7: Sunis 10

“E yu la gaganakan ding sadyang bage, o ituring ding bage luma.

Lawen yu, gawa kung bayung bage, ngeni sumibul yang pasulung;

E yu abalu ite? Gawa ya pa iting dalan king ilang at ilug king tigang.”

~ Isayas│Dangka 43: Sunis 18-19

“Agyang nanu ing milyari keka king milabas

o nanu mang malilyari king bye mu ngeni,

manalig ka pa mu rin king Dyos.

Nung manalig ka pa mu rin, papandatilan ing tiwala,

papandatilan ing makatud a dapat, nung mapamasalamat ka,

akit mung ing Dyos mamusni yang bayung pasbul ning kalam

at pamikatagun, at magdalang e asaang mala king kekang bye.”

~ Padre Pio, Dalangin king Kapaldanan

O anak nang lalaking Kunti, ing e pangmalambatang aske

ning ligaya at lungkut, at ding pangayala da panyatang ning panaun,

mengari la king panyatang ding panaun ning dimla at kaleldo.

Manibatan la king kamalitan panandam, o sapni nang Barat,

at dapat lang e ipagbaliyala a e ka mayayabala.

O pekamayap dili karing tao [Ardyun], ing taung e mayayabala king ligaya

o lungkut at makapagdatila kareti bitasa yang maging karapatdapat

king pangakabus.”

~ Dalit ning Kakataskatasang Panginwan│Dangka 2: Sunis 14-15

***

LIKAS kekatamu ing madalas a daratangan ning lumbe uling ating mebating a bage at liligaya mu naman neng ating bage daratang a magdalang kayapan para kekatamu. E ta man kaburyan daratang ing lungkut, at e ta man kaburyan daratang mu naman ing saya o ligaya.

Atin yang aydake karanasan itang bapa ku dikil keng metung a adalanan nang apu mi inyang maglakad ya keng metung a dake ning lungsud nung nu dakal la ring mabandi. Metung yang masaplalang lungsud nung ituring dapot atin mu naming dakal a taung alang bale, alang ulyang tuknangan, alang pibale-bale sasantungan. Ken lang dalan manuknangan.

Metung kareng alang bale tau ing ikit na’t alabasan a miminum alak. Kababa-baba na pa ning boti inyang kilug ne at sinilip iti. Kabang sisilip ya keng boti ing taung alang bale at mangapakayli ya i apu mi kitnan ne ing abe nang makayantabe kaya at ngana,

“Nanu mo ing pantunan ning taung yan keng kilub ning boti?” Mebigla ya ing kitnan na dapot mekibat ya pa mu rin, “Lalawen na pu nung atin ya pang laman ing boti.”

“Ali. Inya sisilip ya keng boti pantunan ne ing Dyos!” Mengapamulala ya ing pisabyanan na at kaybat tinangu anting pamanayun. Tiglung na pang sinabing apu, “Ing panibatan ning ligaya ning balang metung kekatamu Ya pin Ing Dyos.

Malungkut ya ing taung yan inya lulumud na ing isip na keng alak. Gagawan nang pampalako lugma ing alak, uling bala na nung lasing ya akalingwan na ing sablang kaligaligan na at ligaya na ya.” Nganang mekibat ning antabe, “Ay, wa pin pu, ne!”

Itamu ngan pantunan tamu ing ligaya karing bage keti king yatu. Deng anak a malati karing miyayaliwang pyalungan. Nung bayu ya pa ing pyalungan asno kasasal mamyalung at kabud meluma ne ing pyalungan sumawa ne at mantun ne namang aliwa pang pyalungan a bayu bang saya ya at ugse-uges n’ya mu ing sadaya asna kaburi nang pyalungan.

Wa, mekad saya ya dapot saguli mu, Sinakurap mu at sumawa ne naman at mantun aliwang pyalungan a para kaya panibatan ning tula, dapot paulit-ulit mu ita at lakwan/dasan nya mu ning tula at lumbe pa mu rin.

Itamung makatwa, mantun ta pa mu ring pyalungan, dapot mangaragul nang pyalungan. Mekad bisikleta, kaybat kabud sumawa tamu─motorbike naman. Nung sumawa tamu keng motorbike─kotsi naman. Nung misalapi tamu at agyu ta’nang saling limousine o yatch, o helicopter angga na king private jet. Sali ta’na naman bang ligaya tamu.

Dapot anti karing minuna nang amanung mesambitla, datangan na katamu pa mu rin ning lumbe at pangakalubkuban ning pusu nung karing makalabwad a bage tamu masa at magpumilit palipit kareti bang pikwanan lang tula, saya at ligaya.

Ing malyari at pekasaguling paralan bang dasan ing kabilyan ning tune ligaya ya pin ing pamagsantung king Apung Ginu kapamilatan ning pamanyambitla, pamanungge at pamagdalit karing Kayang Banal a Lagyu. Karing sablang Banal a kasulatan mayakit la ring miyayaliwa nang lagyu ning Dyos at ing upaya da bang mikabus tamu o tanggapan ing kaligtasan. Inya sana e ta na mantun pang aliwang santungan nung e ing Dyos kapamilatan ding Kayang Banal a Lagyu─malungkut tamu man o masaya.

***

Dake Talabaldugan:

milamas (pangdiwa) mipanglamas, miglamas. English – squeezed or mashed one another; two or more individuals squeeze something. Alimbawa king pamangamit: “Milamas la kareng arung dang mala-kamatis dapot e na la man mepikun di Enang at Kuring.”

milamasan (pangdiwa) melamas, melamasan, ating miglamas. English – got squeezed; already squeezed. Alimbawa king pamangamit: “Inya asna kalinis akakit ing abyas a makababad a yan─milamasan na nandin pang bayu ya menyaklu i Ponsing.”

***

MIKASING-KABALDUGANG AMANU TAMU

tipa – munta king lalam dumalan king eran.

kuldas – anti ing tipa dapot malyaring manibatan king aliwang bage kesa keng eran.

baba – e binang manayun a amanu, dapot yang maralas maggamit king kasalungsungan lakwas na karing kayanakan pauli ning pamanagalug da.

lumusung – munta, mekad mamalug, king lakwas mababang dane anti king ilug, sapa, o dayatan.

dumulung – mengari king lumusung dapot e malino nung king danuman o bage ating danum.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king "garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph