Warriors 2-0 Na

Gipakaging sa host Golden State Warriors ang bisita nga Dallas Mavericks aron iposte ang 2-0 nga bintaha, 126-117, sa best-of-seven Western Conference Finals sa National Basketball Association (NBA).

Si two-time NBA MVP Stephen Curry nipaarak og 32 puntos aron bangunon ang Warriors gikan sa 19 puntos nga pagkalubong sa second quarter.

Sa pagpangulo ni Curry, ang team effort sa Warriors maoy nagpasulabi gumikan sa gihimong adjustment sa ilang coach nga si Steve Kerr.

Unom ka mga magduduwa sa GSW ang adunay double figures nga score nga gilangkuban nilang Jordan Poole, Kevon Looney ug Andrew Wiggins kinsa pulos nakamugna og mga crucial play.

Sukad niadtong 2014-2015 diin si Kerr na ang nagtimon sa Warriors, aduna na silay 12 ka playoff comeback wins human sila gilubong og labing menos 15 puntos.

Si Loobey nirehistro sa iyang career high 21 points inabagan sa iyang 12 ka rebounds.

Si Kerr niawhag sa iyang team nga di magpalupig human sila gilubong sa Mavericks sa first half.

“I told them that if we developed some poise in the second half that the game would come to us. I thought we were so scattered in the first half, maybe emotionally more than anything. Dallas came out and punched us,” paghulagway ni Kerr.

Ang head coach sa Warriors nagkanayon nga ilang gipangandaman daan ang suway nga panimalos sa Mavericks diin sila nakapasulod og 15 ka tres sa first half.

Sama sa gipaabot, si Luka Doncic ang naghuramento kinsa nipabuto og 42 puntos, 8 assists ug 5 rebounds apan kuwang gihapon ang iyang paningkamot.

Niabag og 31 puntos si Jalen Brunson ug 21 puntos ang giamot ni Reggie Bullock ug wala nay laing Mavs player ang nakakuha og double digit score.

Ang Warriors nakuratan sa gipakitang gilas sa Mavericks sa first half diin sila nipahagsa og 72 puntos sa unang duha ka quarters. Sila nagbitbit og 14 puntos nga labaw 72-58 sa dayong sulod sa third quarter.

Si Doncic maoy nangulo sa pagpamomba sa Warriors pinaagi sa iyang 24 puntos sa first half ug 20 puntos kang Brunson nga gibituonan sa iyang 4 ka tres ug samang gidaghanon sa tres ang gipaarak ni Bullock.

Gikan sa sinugdanan, ang Mavericks naglabaw og 5-0 pinaagi ni Doncic ug laing 13-0 run alang sa Dallas 23-8 sa pagkahurot sa pipila ka minutos sa first quarter.

Ang Warriors wala nagpalupig, nihimo og ilang kaugalingong 13-0 run aron idikit ang score 26-23 apan subli na usab nga nipaarak sa ilang opensa ang Mavericks pinaagi sa ilang mga long-range shooting.