Gilangkat sa mga Pinoy ang bulawang medalya sa 10-ball ug tennis men’s double sa 31st Southeast Asian Games sa Hanoi Vietnam.
Si Rubilen Amit maoy nipatigbabaw batok sa laing Pinay nga si Chezka Centeno sa all-Filipino final sa women’s 10 ball singles.
Nakaposte og 7-5 nga kadaugan kagahapon si Amit batok ni Centeno, kinsa maoy defending champion ug maoy iyang ikaduhang gold sa Hanoi games.
Ang pagkasipyat ni Centeno sa opening rack maoy naghatag og agianan ni Amit para maestablisar ang 3-0 nga labaw.
Si Centeno kinsa nakahipos na og upat ka bulawang medalya sa iyang career sa SEA Games nihimo sa iyang kaugalingong rally aron ibanan ang labaw, 2-3.
Human naposte ni Amit ang 5-2 lead, si Centeno nakabalik sa duwa ug natabla ang score 5-5 apan ang kampyeon sa 9 ball maoy nidaog sa duha ka sunodsunod nga rack aron angkunon ang bulawang medalya.
Niadtong Martes, si Amit usab ang nilangkat sa gold medal sa 9-ball human iyang gipilde si Jessica Tan sa Singapore 7-2.
Samtang gilangkat nilang Treat Huey ug Ruben Gonzales ang men’s double gold batok sa laing mga Pinoy nga silang Francis Casey Alcantara ug Jeson Patrombon nga maoy defending champion.
Ang top seeds nga sila si Huey ug Gonzales nimakmak nilang Alcantara ug Patrombon, 6-1, 6-4 sa Hanaka Paris Ocean Park sa Vietnam.
Kapin duha ka tuig ang nakalabay, sila si Huey ug Gonzales maoy nakakuha sa silver medal human sila gipilde sa ilang kaubang Pinoy atol sa 30th SEA Games.