Nanuktok na ang bulawang medalya sa Gilas Pilipinas human ilang gipukan ang Malaysia, 87-44, atol sa ilang ikalimang duwa sa 31st Southeast Asian Games sa Hanoi, Vietnam.
Ang Gilas kinsa nisilhig sa ilang unang lima ka mga kontra adunay 5-0 nga standing ug hayan maharos na usab sa nasod ang men’s basketball sa SEA Games.
Si Thirdy Ravena maoy nangulo Gilas pinaagi sa iyang 17 puntos ug 7 rebounds samtang nagkumboya og 19 puntos silang RR Pogoy ug LeBron Lopez.
Ang kapildehan sa Malaysia maoy ilang ikaduhang sunodsunod nga kapildehan ug nahagsa sa 2-3 nga standing sa regional competition.
Naglabaw ang Malaysia 10-9 sa tunga-tungang bahin sa first quarter human napasulod ni Anthony Wen Quian ang iyang itsa apan ang Pilipinas nipaulan og 10-0 run pinaagi sa pagduslit ni Ravena sa iyang tres aron iposte ang 19-10 nga score sa unang 10 ka minuto sa duwa.
Nitubo ang labaw ngadto sa 18, pinaagi sa 28-10 nga score sa second quarter human wala nakapuntos ang Malaysia sa unang upat ka minuto.
Sa second half, naghuramentado na pag-ayo ang Gilas ni Coach Chot Reyes human naestablisar ang 49-24 nga labaw sa tunga-tungang bahin sa 3rd quarter
Ang pagsutoy ni Kib Montalbo gikan sa pikas ring paingon sa ilang korte ug ang jumper ni Pogoy maoy nag-inat sa labaw ngadto sa 35 puntos, 68-33.
Napun-an pa ni Will Navarro ang labaw human iyang napasulod ang putback 74-33 sa nahabiling 8 minutos sa duwa.
Ang Gilas nagtinguha nga ilang malangkat ang ika-14 ka sunodsunod nga bulawang medalya sa SEA Games ug ika-19 sa kinatibuk-an.