Migallen: Mavericks makabangon pa kaha?

Pastilan. Kon nakakita mo sa unang 24 minutos sa duwa sa Game 2 tali sa Golden State Warriors ug sa Dallas Mavericks kagahapon unya kutob ra mo sa halftime, labing siguro mahibulong mo kon inyo na lang mahibaw-an nga nidaog pa gyud diay ang Warriors, 126-117.

Tiaw mo bay kontrolado kaayo sa Mavericks ang unang duha ka kwarter sa panagsangka diin sila nakaposte og 72-58 nga labaw sa halftime.

Pero sa unsang pagka unsaa nga sa kalit lang, ilabi na sa third quarter, nibali man ang momentum nga daw og wa ka preparar ang Mavs sa pagpangataki sa Warriors.

Dugay nga naka timeout ang akong idol nga si Dallas coach Jason Kidd sa dihang nipabaha og dakong rally ang Golden State.

Sa sinugdanan pugdol ang opensa sa Warriors tungod sa hugot nga depensa sa Mavericks. Ang mga outside shooting nila ni Steph Curry, Klay Thompson ug Andrew Wiggins wa kaayo kapahimusli tungod sa hugot nga depensa sa Mavs.

Abi nako og mahisama to sa gihimo sa Dallas ngadto sa Phoenix sa Game 7 sa ilang Western conference semifinals series diin wa gyud makabangon ang Suns human mabiyai og dako.

Pero lahi diay kay nakakita og igong solusiyon ang Golden State nga wa maalkontrahi sa Dallas.

Nisabay ang Mavericks sa pakusganay ug sa dihang nanginit ang mga kamot nila ni Curry ug Thompson nibuka ang depensa sa ilawom nga bahin nga maoy napahimuslan og maayo sa Warriors.

Kini maoy hinungdan kon nganong ang ilang bigman nga si Kevon Looney nakakulit og career-high nga 21 puntos ug 12 ka rebounds.

Sa laktod nga pagkasulti, gilupig sila sa ilawom nga bahin. Ang stats nagpakita nga sa 16 ka attempts sa Warriors sa shaded area, 14 niini nakombertir batok sa Mavericks nga wa gyuy nahimo.

Kini igo na kaayong nakasuporta sa 32 puntos ni Curry kinsa may lima ka assists.

Wa usab silay dag-anan sa rebounding department (43-30).

Hinuon, ang panagparis nila ni Luka Doncic ug Jalen Brunson pabilin nga nagmahaiton. Si Doncic mitapos sa duwa nga may 42 puntos ug walo ka assists samtang si Brunson niyagyag og 31 puntos.

Pero wa kini mapaigo tungod kay kuwang kinig suporta sa ilang mga kauban. Gawas ni Reggie Bullock nga may 21 puntos, si Maxi Kleber nga nakaduwa sulod sa 33 minutos igo rang naka tres puntos, usa ka rebound ug usa ka assist.

Si Dorian Finney-Smith aduna lay 10 puntos sa 42 minutos.

Samtang sa Warriors, unom ka buok ang naka-double figures. Gawas nilang Curry ug Looney, si Jordan Poole adunay 23 puntos, Wiggins 16, Thompson 15, ug Otto Porter nga my 11 puntos.

Kon gusto ang Mavs mobawos sa Games 3 ug 4 didto sa ilang korte, kinahanglan nga mopakita usab og saktong labok kining ilang mga backup.

Kay kon dili, layo ra sa tinuod nga makabangon og modaog sila sa series human maunhi og 0-2 sa kontra, sama sa ilang gihimo sa Suns.

Ang Warriors gagmay pero sakit tungod kay anaa nila ang kusog ug kaabtik ug sa hamubo nakong panglantaw, sila maoy moabot sa finals. (jun.migallen22@gmail.com)