Gikan sa klase sa biseklita ngadto sa mga brand, daghan ang maglalis kon unsay maayo. Ang nakapait kay alang sa mga bag-o pa kaayo nga ganahan makabaton og biseklita, maglisod ka sa pagpili kay inay giyahan ka, ang imong mga amigo gustong ang ilang ganahan nga klase sa biseklita maoy imong paliton.
Unya ila pang ipamugos ang brand nga ilang ganahan aron maoy imong paliton.
Naa say ubang sellers, kana kon mag second hand ka, nga utro sang way hanaw sa ilang baligya. Ingnon ra kang Shimano ang parts ani. Kadaghan baya sa model sa Shimano, naay bati ug naay labing nindot. Agad na sa presyo sa model.
Basta sa ako nang giingon, what you pay for is what you get. Kon mahal, natural guaranteed ang kalig-on o durability.
Tan-awa lang, sa una nag-ilis-ilis ko og stem kay lainlain man og suggestion until diha ko naka realize nga ang importante haum sa akong body geometry ug comfortable ko sa akong pag ride. Hit and miss ang akong gibuhat.
Bisan sa ligid, naa say daghang mo-suggest unsay maayo. Maayo ra ba og silay mopalit ug mogasto, ikaw ra ba. Sa akong experience, nagkadugay wa na ko nigamit og wired bisan kon para nako lig-on kaayo na. Bug-at man gud.
Kay XC man ang akong discipline, sagad sa gilapdon sa akong ligid naa sa 2 ngadto sa 2.1. Nag 2.23 ko karon mao nga sangkiig kong magsaka while ang akong frame 29. Grabe na gyud ko kahinay magsaka sukad nag 29 ko.
RESEARCH
Aron di mausik ang imong kwarta, pag research og maayo sa di ka pa mo decide nga mopalit og bike. Kon magpa advice man gani ka, pangamigo og bike mechanic nga biker sab. Mao na ang akong gibuhat sukad kaniadto.
Kana gud sila mao ra man say moayo sa imong bike kon maguba o magkinahanglan og maintenance. Maka advice na sila unsay maayo, unsay suwayan ug unsay bang for the buck sa imong budget. Mas close nimo ang mekaniko, mas motambag na og unsay mas maayo.
Ayaw pag expect nga kon mopalit kag second hand unya barato nga maayo ni og quality. Posible nga sa pipila ka mga gamit, mabugto na dayon na.
Pag research kon unsay maayong brand new parts ang paliton ug unsay maayo nga second hand lang. Alang nako, ang handle bar, seat post ug stem nga di moving parts okay lang na kon slightly used. Apan kon moving parts, you better opt for brand new.
KON KAILA
Apan kon nakaila ka sa tag-iya or dunay mo-guarantee sa part nga imong paliton nga second hand, go for it. Ako bitaw naa may second hand parts sa uban nakong bikes nga dugay nang napalit nako. Hangtod karon reliable pa gihapon kaayo.
Gikinahanglan lang gyud ang periodic nga maintenance aron molungtad ang imong pyesa.
Sa pagpabarog og bike nga makadaginot, i mix ang daan ug bag-o. Apan ang labing maayo ug una nimong buhaton mao ang pagtimbang unsa ang ganahan nimo nga klase sa biseklita: mountain bike, road bike, folding bike, fat bike. Lainlain sab ang disiplina sa MTB. Pag research lagi.