Hapit na duha ka semana nga nahuman ang eleksiyon sa Mayo 9, 2022. Apan bisan unsaon, di ko motuo sa resulta. Mor pa. Problema karon sa mga nakadaog kay daghan kaming wala motuo sa maong resulta.
Di man lang gud ang 31 milyones nga giingong labaw ang nakapaduda kanako.
Di katuohan ang kapaspas sa pag-ihap. Nahuman na gud ang pag-ihap sa nasiyonal bisan og wala pa maka-transmit ang pipila ka presinto.
Di katuohan ang uniporme nga porsento sa labaw ni Ferdinand Marcos Jr. kang Leni Robredo kada remit gikan sa mga presinto.
Di katuohan nga daghang mga presinto nga 100 percent si Marcos samtang zero ang mga boto kang Leni.
Bisan pa man, angay untang mangalipay ang mga supporter ni Marcos Jr. ug Davao City Mayor Inday Sara Duterte-Carpio. Apan mingaw man.
Ningtuo ba sila nga tinud-anay ang ilang kadaugan? O sila mismo nakahibawo kon giunsa nila pagmugna ang 31 milyones.
Bisan pa man, hangtod dunay maingon nato nga “smoking gun” proof nga dunay binuang ang maong eleksiyon, kutob lang gyud kita sa pagduda.
Ang problema sa administrasyon ni Marcos ug Duterte puhon, di gihapon katuohan ang ilang kadaugan.
Apil sa kampanya
Wa ko makauyon sa maong baruganan. Apan, sa usa ka anggulo, makaingon ako nga duna sab kiniy kapasikaran. Nga kining pagpanikas labi na ang pagpamalit og botos, apil na sa tradisiyon sa eleksiyon sa Pilipinas.
Ikapila na ko nisuway og dapig sa mga kandidato nga wala mamalit og botos tungod lagi sa prinsipyo. Apan gilampaso man hinuon sila.
Usa kanila mao si kanhi Cabinet Secretary Jun Evasco nga nidagan sa pagka gobernador sa Bohol sa miaging 2019.
Daghan ang mga istorya nga gibalibaran gyud niya nga mopadayon ang pipila niya ka mga tigpaluyo sa planong mamalit og boto. Lalim bay kapin ra sa dos mil ang labaw ni Gob. Art Yap.
Sa miaging eleksyon, diha nako nakita nga apil sa estratehiya ug taktika ang pagpamalit og botos labi na kon pulos mga trapo ang nagkaatbang.
Paglaom
Hinuon, akong pangagpas nga wala mapangandami ang grabing paggamit sa computer system sa pag-ihap sa mga boto sa nasyonal nga piliay. Lisud man gud kini sakpon. Kon walay mopiyait, unsa may mahimo sa oposisyon gawas sa pagduda na lang?
Bisan pa man, sayang ba ang dakong kalihokang Kakampink nga namugna sa tibuok nasud?
Nakapanamin lang ko sa akong kamanghuran nga anak nga nagtuo intawon nga ang eleksyon sa 2022 moresulta og dakong kaayuhan sa nasud, dili ang pagbalik sa mga Marcos.
First-time voter kini ug grabi ang idealism. Mao nga nasurpresa ko nga wala diay katulog kini tungod kay naghilak kabahin sa ilang future.
Ug dili lang kini siya. Kadaghan diay sa mga first-time voter nga nanghilak. Ug nagresolba sila nga maninguha na nga mausab ang dagan sa kasaysayan sa Pilipinas.
Kaniadtong piliay sa 1978, dugay ko nakaamgo sa pagkamahinungdanon niini. Apan, human sa pipila ka tuig, minilyon sa akong henerasiyon ang nisalmot sa rebolusyon sa Edsa.
Alang kanako, naa na sa ilang henerasiyon ang paglaum karon. (DM nako sa @anol_cebu)